有留意曼聯或者睇開我地啲分析嘅朋友，應該都知迪基亞近年啲近距離單刀迎對確係非常之差，而且唔止一兩次因為驚有接觸驚傷而唔敢成份去曬。而鏡報就搵到一位非常有份量嘅前英超球員去講下佢嘅見解，呢位就係喺英格蘭同蘇格蘭上陣差唔多800場比賽，效力過29間球會以及英超最年長上陣球員紀錄 (43歲4個月29日）保持者貝歷治 John Burridge。
現齡69歲嘅貝歷治依家係阿曼第二級別聯賽球隊 Bowsher 嘅義務守門員教練，鏡報記者問到佢對於現今嘅門將有咩見解嘅時候，佢就話真係非常之失望，特別對於現今嘅守門員教練非常不滿。
「守門員呢一門藝術已經沉淪緊。當我見到一啲如果喺三十年前根本連英冠都唔夠料踢嘅球員有份代表英格蘭上陣真係火都黎埋。」
「依家守門員嘅首要條件就係最少要有6呎4寸高，就算你係一個懦夫你驚波都無人理。」
「我見到迪基亞之前對住個波成個身擰埋一面。曼聯嘅守門員怕受傷。我覺得實在係難以置信。」
「不過迪基亞並唔係唯一一個。有唔少人都係一邊好滿意地拎住一份十萬鎊週薪嘅合約，另一邊就驚死出迎會比人省爆牙或者爆鼻。」
「實會有人話『貝歷治都過曬氣啦，佢識條鐵咩？』。不過我同過唔少對手傾過相關嘅問題，佢地個個都好認同我嘅睇法。」
「依家啲 Keeper 淨係識老舒米高 Peter Schmeichel 嘅招牌絕技－星型救波 (Spread Save)。」
「但其實老舒米高淨係會喺同個射手距離夠近嘅時候先會咁做。」
「如果你見到有個 Keeper 下下撲波都用腳行先，你就知道佢根本唔夠膽色去令佢成為世界級球員。」
「但依家似乎有唔少教練直頭教啲球員乜都用腳行先。」
「你睇下啲大球會嘅守門員教練，差唔多個個都係本身唔夠料做一位職業守門員就去咗做守門員教練。」
「啲勁嘅球員個個都搵咁多，退咗休之後根本都唔會再有動力繼續留低做教練，變相肯做教練嘅就得返一班根本無料嘅人。」
「就算佢地個個都話自己有證書證明自己有資格去做，但佢地有嘅經驗可能根本同班球員差唔多。」
「守門員係一個特殊嘅位置，而經驗對呢個位置黎講係非常重要。所以點解好多 Keeper 愈老愈好波。」
「我自己認為，最理想嘅守門員高度係6呎或者6呎1寸。但現今嘅足球就係如果你唔夠6呎4寸，你諗都唔使諗。」
「其實依家已經好少再有球隊會不停用高空轟炸戰術，不停放高波入禁區比一啲高大前鋒企係後柱準備不停用頭鎚攻門。」
「當我見到古圖奧斯嘅時候，我好似見到一隻長頸鹿做緊守門員咁。」
「你會寧願想做一隻靈敏而又有膽色嘅貓／老虎／獅子定係一隻長頸鹿？」
「想當年成日都話你一定要係一個癲佬先會做守門員，因為你一定要接受你係有機會因為幫球隊保持不失球而受傷。」
「依家？無呢支歌仔唱喇，陰公。」
------------------------
睇完貝歷治呢篇訪問，大致上我都確係認同依家好多球員都好錫身，怕受傷唔敢成份去曬，好似無咗以往睇波見到班球員嘅一份血性咁。我諗同人工唔多唔少點都有啲關係，因為依家嘅球員確實比起之前賺多好多錢，而如果因為受傷而無咗正選或者甚至要轉會，佢嘅身價可能已經會大跌，令到之後續約或者甚至可能要轉會就無能力爭取返原本嘅薪金水平。同埋錢一多，確係會令到唔少純粹想搵錢嘅球員入行，就未必個個都一樣對足球好有熱情，唔會做多，穩穩陣陣收工等退休就算。
而貝歷治講到身高方面，其實坊間黎講都確係一個幾大嘅誤解，覺得一定要夠高先得，但其實有唔少唔夠 190 cm 嘅門將一樣表現唔錯。講到尾都係夠唔夠膽色出迎同埋有無努力訓練增強自己嘅彈跳力。但我就唔認同佢拎古圖奧斯做例子去指定高都唔一定好，因為事實上有返咁上下高度點都有優勢，雖然接地波可能動作上會無咁快，但絕對可以靠訓練去提升呢方面嘅能力，高有高踢矮有矮踢。
至於佢講到教練嗰方面，坦白講我就唔太認同。因為我自己覺得一位本身球員年代都勁嘅人做教練都一定好，識踢唔等於識教，無錯佢可以比到相關嘅經驗比佢嘅球員，但依家資訊科技咁發達，其實可以靠好多唔同途徑去學習同埋增加自己嘅經驗。而且就算位教練本身技巧十分高超，如果佢唔識點樣解釋比班球員聽佢嘅睇法或者意見，其實都一樣傳承唔到。當然最理想嘅係教練本身又好波，而佢又拎曬啲資格，不過就算教練自己唔係最好波，我認為都一定可以憑住努力學習，多啲同其他人交流同埋分析去增進自己能力同經驗，從而去幫助球員進步。
貝歷治 鏡報訪問全文
請按此登錄後留言。未成為會員? 立即註冊