單刀幾何學 - 封位與射門角度

之前出過唔少龍門單刀應對嘅分析,估唔到引來的迴響比想像中大。大家對單刀出迎嘅距離普遍有較大嘅意見分歧,所以今次以數字去量化之前嘅判斷和決定。

網上搵到嘅數據,職業球員射波球速約70mph(即時速112公里),皮球由射手起腳至14外門將面前只需0.41秒,而職業門將反應時間平均約0.3秒,換句話說到球員真係有反應時皮球與門將只剩下約4碼距離。但如果門將早出迎的話,又走到出小禁區外,皮球與門將距離便一下子縮短7米,皮球飛到門將面前嘅時間減少0.2秒,門將好大機會俾唔切反應,射手唔洗射個好刁鑽嘅波,只係手邊或腳邊波門將都反應唔黎。相反,如果門將唔輕出而係與射手(腳下的皮球)保持距離,距離每增加2碼可為自己爭取多0.06秒的反應時間,以18碼距離為例,皮球飛到門將面前需要0.53秒,時間勉強足夠於對方起腳前完成小跳步落地動作,再做 Power Step 然後作出撲救。

再講講出迎可以收窄嘅射門角度,以禁區頂至K角位20-22碼為例,側面至正面嘅可射門角度為14°-31°,以龍門企位為中線計,面對側面14°單刀時出迎:每企出2碼實際只可收窄射門角度為左右22.9cm(單邊計,即左右可射門角度各減少22.9cm),以一個1米8身高嘅成年人計,臂長平均76.5cm,門將企定定張開雙手伸盡計其實已可cover出迎企出6碼嘅射門角度。所以較遠距離(14碼以外)嘅單刀門將其實無必要企心急出迎,留在小禁區內、企近白界線對出1.5 - 3 碼內,拉遠自己和皮球嘅距離,為自己爭取更多反應時間更為有利。太早出迎亦有另一問題,就係身後位置太多,射手除咗熨角之外可以選擇笠射或扭過門將射空門。相反,與皮球相距14碼以內嘅近距離單刀,門將應果斷出迎,近距離嘅射門單靠反應去撲救係極度困難,所以應該要以身體盡量遮擋對方可射門嘅角度從而提高對方處理單刀嘅難度。


再次引用施治早前對於12碼改例意見嘅原句作結:「請問一個門將點先可以唔靠任何腿部準備動作就可以喺一個 7米32 乘 2米44 咁大嘅龍門框救出一個時速 112 公里,只需要 0.35 秒就飛到去白界嘅射門?」大概意思係「12碼距離咁近,個波又咁快射埋黎,龍門就算捉路都未必夠到,因為唔比向前封位,最後一刻先准撲,捉路都未必撲得夠遠。」面對14碼內嘅射門,靠反應多數都唔會撲得切,所以出迎封窄角度係必須的,至於用 Block Save 定 Spread Save 就要睇情況而定。至於距離較遠嘅單刀,其實真係無必要太早出迎,與射手保持距離為自己增加反應時間,使用 Wait & React 技巧 睇定先做決定都唔遲。單刀其實係門將與射手之間嘅對弈,出迎而否要夠冷靜同決斷以避免露出破綻,準備動作做到足龍門未必係被動嘅一方!

留言


請按此登錄後留言。未成為會員? 立即註冊
    快捷鍵:←
    快捷鍵:→