琴晚嘅一場英超聯比賽由列斯聯對住韋斯咸，當中又發生門將撲完12碼之後 VAR 話射手掂波一刻位門將並無最少有一隻腳留喺門線上，而今次受害者就係韋斯咸門將法比安斯基。
當時12碼由列斯聯嘅基連治操刀，法比安斯基本身成功捉路撲出第一球12碼，最後仲接實埋。點知 VAR 就影到法比安斯基喺基連治掂波一刻，兩腳已經完全離開白界，最後被判重射，而第二次操刀基連治就成功把握機會射入，令當時列斯聯領先 1:0。
呢條新例一來都引起唔少爭議，有做過門將救12碼都知，由於本身12碼對自己極不利，以往為咗可以覆蓋更加大嘅範圍，都會向前踏前一至兩步再向捉路嘅一邊打斜做一個 Power Step 令到自己飛得更加遠。但新例底下，所以門將喺射手掂波一刻最少要有一隻腳喺底線上，所以已經唔可以再做出向前踏步嘅動作，最多只可以喺射手觸球一刻先做 Power Step。
而車路士嘅技術顧問及門將施治就喺 Instagram 為法比安斯基抱不平，表示呢條例根本極不公平，佢就話：「請問一個門將點先可以唔靠任何腳部準備動作就可以喺一個 7米32 乘 2米44 咁大嘅龍門框救出一個時速 112 公里，只需要 0.35 秒就飛到去門線嘅射門？無建設地批評容乜易，所以我提議: 球證用罰球噴劑喺門線前 1碼多啲畫多條線，而門將撲波隻腳唔可以跨過呢條線咁咪得囉 🤷🏻」
施治呢個 Post 引黎唔少職業球員支持比 Like，包括卡斯帕舒米高、古圖奧斯、艾達臣等等。不過亦都有唔少網民話12碼本身就係罰守方，限制門將嘅動作係公平不過嘅事。更加有人話門將如果要向前咪一開始企係白界後面囉，但其實球例講明門將準備嘅時候同樣需要踩住白界線先可以開始12碼嘅程序，所以呢個建議好快就比人插到反艇。
首先本身呢條新例嘅用意，除咗所謂嘅更公平之外，其實我覺得都好明顯係為咗進一步減少門將嘅優勢而令到有更多入球出現而設。所以我都幾支持施治嘅建議，1碼話多唔多話少唔少，而且向前踏其實都係一個門將好自然嘅封位動作。就算多咗呢一條線，本身個龍門框咁大，其實射手仍然有好大優勢可以射入。
你地又點睇呢條新例同埋施治呢個建議呢？新例執行起上黎係唔係對門將太過嚴格呢？而施治嘅意見又係唔係大家嘅心聲？
請按此登錄後留言。未成為會員? 立即註冊