遠射黃大仙 祖「嚇」特預判錯漏百出


講完歐聯就到歐霸,相信今週其中一個主角都一定有熱刺門將祖赫特嘅份喇,因為佢被三個遠射收死,令熱刺最後被連斯逼和 3:3,當中祖赫特嘅第一同第二個失球真係嚇死人...

--------------------

42" 米哥爾
當時仲係 0:0,連斯中場米哥爾大慨喺離門 30 碼嘅距離一控即刻抽一個遠柱射門,祖赫特呢下臨迎接射門之前向前跳咗一下,可能想封一封射門角度啦,但就係呢下向前跳令到佢身體重心變咗向後。
而門將做撲救嘅重心一向都好重要,如果唔係好易影響到撲救嘅方向,力度以及準繩度,而就係呢個擺錯咗嘅重心令到祖赫特只能向後撲,以及變成「眼低手高」完全撲空,撲咗個波嘅上面...
雖然歐霸盃嘅專用波 Molten 一直都有唔少人話有少少過輕令到個波好飄,令到門將好難睇準個波,但係呢下無得賴架喇,祖赫特事實係準備動作做得唔好而奶野。

84" 艾格史甸
呢球仲失得肉酸,連斯嘅艾格史甸左路推進,當推到去禁區頂就起腳射一個近柱中腰波。而祖赫特呢球最後竟然嘗試用前臂擋波,最後仲擋埋入網。
我翻睇再翻睇,發覺原來佢衰在個 Set Position 由膊頭闊度,到艾格史甸射門一刻做咗一個小跳步去重整身體重心,但之後落地一刻竟然係仲闊過原本嘅膊度,差唔多闊咗成隻腳板咁多。呢一下由窄變闊嘅 Set Position 係會好易打亂門將嘅身體平衡,從而令到祖赫特嘅預判出錯。
你可能話,喂 達史特根同紐亞個 Set Position 夠闊啦,又唔見佢地有問題?咁係因為佢地未做小跳步之前本身已經係企得咁闊,做完小跳步之後落地維持同一個闊度,所以無乜影響佢地嘅身體平衡,但祖赫特呢一下由窄跳到闊就好影響佢撲救動作嘅一致性。
----------------

呢兩個失波所犯嘅小問題其實好多門將間唔中都會犯,不過相信未必有祖赫特犯得咁密集,形成佢真係好似面對親遠射都比較弱嘅形象。

但其實佢都仲維持到佢單刀應對呢個強項,例如31分鐘佢面對住連拿嘅單刀,佢都好決斷出迎以 Spread Save 擋出呢球射門。比你係摩連奴,下場歐霸你仲用唔用祖赫特好?

祖赫特 對 連斯 頭兩個失球精華
https://youtu.be/u2v8s8IgYEs
標籤: 熱刺  祖赫特  失誤  門將  

留言


請按此登錄後留言。未成為會員? 立即註冊
    快捷鍵:←
    快捷鍵:→