14碼以內殺曬以外就變弱點？艾達臣輕出繼續累事 精選 推薦

經過咗國際賽週之後，英超又返黎喇。星期六晚嘅比賽有好幾位門將當中嘅表現都值得拎出黎討論一下，而重點又係去返講到口臭嘅單刀應對同埋門將心理質素嘅問題。
首先第一位想講嘅係阿士東維拉門將馬天尼斯，初初加盟嘅時候佢一路都表現非常之好，地標戰已經撲出12碼幫維拉保住勝局。不過昨日對住白禮頓嘅比賽入面，第一個失球佢確實幾令人失望。首先攻勢來自至白禮頓喺中場位置由拉蘭拿放一個直線比韋碧克，而當時維拉嘅球員全部都喺韋碧克身後，所以韋碧克可以一路長驅直進。韋碧克推咗三腳波，本身馬天尼斯都有墮後去返小禁區頂，點知當韋碧克推到去禁區頂個波仍然非常癡腳嘅時候，馬天尼斯突然決定出迎，但又未去到個波面前。呢個決定令到馬天尼斯嘅企位唔上唔落。射門角度又封唔到，仲放棄埋回身嘅機會，等於教埋韋碧克點做，就係一個笠射就輕鬆射破馬天尼斯十指關，令白禮頓領先 1:0。
首先韋碧克射門嘅位置仍然喺禁區頂附近，之前我地已經提過其實離門14碼以外嘅單刀出迎嘅效率係極低，因為根本唔會封得切位之餘仍會留好多位比對方笠射，而且仲會大大減少自己可以反應嘅時間。再加上韋碧克射門一刻馬天尼斯已經跪低咗喺地下，連可以憑反應跳高盡力擋笠射嘅機會都無埋。之後仲有一次係慕比嘅單刀機會，馬天尼斯同樣喺慕比就黎去到禁區邊嘅時候佢已經走到出禁區外去封位，雖然最後馬天尼斯成功用腳擋出慕比一個無角度嘅地波射門，但呢下馬天尼斯其實真係非常好彩，首先佢出咗禁區已經唔可以用手，加上如果慕比再冷靜啲，其實笠射又得扭過馬天尼斯都仲得。

之後想講嘅就係標題提及到嘅曼城門將艾達臣。今場曼城作客對住熱刺，即使熱刺兩個入球都係單刀／半單刀波，其實坦白講兩球艾達臣都真係要負幾大嘅責任。首先開波無耐已經有一個半單刀機會，當時安當比利吊一個高波比孫興慜笠過曬全部曼城後防，只係得簡些路一個可以追到去孫興慜隔離，而孫興慜推到去禁區頂已經對住企到差唔多離門14碼嘅艾達臣。令到孫興慜只係射一個中間嘅地波，艾達臣都已經完全反應唔切，咁就輕鬆通咗艾達臣嘅坑渠，熱刺領先 1:0。
第二球就係熱刺一個反擊攻勢，哈利簡尼由中場一路推進，然後佢放一個直線比洛希素去追。洛希素推咗一腳，艾達臣已經出迎去到小禁區再出多兩三碼，雖然迪布尼已經回防比咗小小壓力洛希素，但由於艾達臣出迎動作太急停唔切（令身體難以反應）以及封位動作亦做得唔好（兩腳之間空日太大），洛希素只需要射一個正中間嘅地波已經射穿艾達臣，艾達臣今場第二次被通坑渠，熱刺領先 2:0。

首先講返上季艾達臣嘅單刀撲救率係有成64.52%（平均值55％），對於14碼內嘅單刀佢更加有成 76% 撲救率，但14碼以外嘅單刀佢嘅撲救率就只有50%（14球失7球）。而佢失嘅嗰7球入面有6球嘅情況就係類似佢今日失嘅兩球咁，對於14碼以外嘅單刀波太過輕出。一係就本身因為要做埋清道夫所以企位好出，但當對面一反擊甚至單刀嘅時候佢偏偏唔會墮後企返近龍門，決定企定定喺同一個位比反應，一係就明明未去到最急切嘅位置就衝出黎做無謂嘅封位。呢個習慣令到佢嘅企位同之前馬天尼斯一樣唔上唔落，封唔到射門角度之餘仲令自己無時間比反應。艾達臣呢一個弱點喺上季復賽之後特別明顯，雖然唔知原因係乜，但門將教練無理由睇唔到呢個咁明顯嘅習慣架？
艾達臣呢兩球都明顯地可以更加冷靜地處理，首先第一球孫興慜拎波嘅時候，佢應該即刻回後企返去大約小禁區頂嘅位置先。就算孫興慜見到艾達臣企得咁後都照起腳，艾達臣都應該反應夠快做撲救。而如果孫興慜決定再推，以簡些路嘅速度應該絕對可以比到更大嘅壓力孫興慜，加上角度只會更窄，咁艾達臣要做撲救都會相對容易。而第二球艾達臣見到洛希素控波嘅時候其實真係唔需要出迎，首先射門角度唔算闊，迪布尼已經追到返黎，而十二碼點亦有多位隊友回防，加上洛希素離門仲有成15/16碼以上。其實只要艾達臣企返喺底線同小禁區中間嘅位置已經足夠，就算洛希素要起腳，艾達臣都有足夠時間比反應做撲救。

但其實昨晚另外都有兩位門將完美示範門將夠冷靜實有著數。首先就係曼聯門將迪基亞，佢喺對住西布朗呢場比賽當中救出咗一球近射，令當時曼聯保得住0:0 嘅戰況，最後更加以 1:0 終於喺今季英超第一次喺自己主場贏波。呢個撲救係源自西布朗右路一個高波吊入禁區，但12碼點無人頂到嘅情況下令遠柱嘅干拿唐辛成功接應，不過迪基亞臨危不亂決定企定定喺底線前做好準備，最後唐辛喺左邊小禁區頂左腳一下硬射，迪基亞以左腳擋出。當時如果迪基亞亂咁出迎或者夾硬用手救嘅話，相信唔會比得切反應做出呢下撲救。而另一位因為冷靜而做出靚撲救嘅就係熱刺門將羅利斯，當時熱刺已經領先緊曼城 2:0。迪布尼右路罰球斬到去小禁區頂，羅利斯見勢色唔對就決定唔出迎，同埋加緊腳步做多幾下小跳步令自己可以反應再快啲，而曼城新兵魯賓迪亞斯就成功接應並頂向龍門，幸好羅利斯嘅預備充足以及並無輕出，令佢成功救出呢球近門頭鎚。
所以話，門將反應幾快撲救幾叻都好，如果唔冷靜你想發揮都發揮唔到。希望艾達臣可以儘快修正呢個輕出嘅弱點，如果唔係以曼城嘅 high line 打法以及佢做 Sweeper Keeper 嘅角色，呢啲波佢真係有排輸。