英門將教練短評三位門將 嫌棄K腳太新潮太被動？ 精選 推薦

襯住國際賽週，Sky Sports 就同英格蘭門將教練 Martyn Margetson 做咗個訪問，內容就講到佢對現時英格蘭國家隊三位門將嘅意見。
1. 碧福特
首先講嘅係修夫基喺早排話現階段暫時係無人可以取代嘅碧福特，Margetson 就認為佢臨迎接射門之前嘅 Set Position 經常提升自己撲救嘅難度，例如佢成日都座到好低（膝頭屈到差唔多90度），從而令到佢對手嘅位置都放得好低，差唔多放到喺腳踭隔離，令到佢對住一啲高過頭嘅射門就會顯得好吃力，就算救到都只係靠當刻突然神速嘅反應先救得到。

碧福特另外一個小缺點就係撲救前佢嘅兩隻手嘅高度經常唔對稱，一高一低。令到佢有時明明可以雙手接都變咗單手撲救，再次增加撲救嘅難度。所以 Margetson 就建議門將應該儘量將兩隻手放喺視線範圍之內，令到個腦更加客易決定用邊種撲救方式。
然後 Margetson 提及之前愛華頓對費列活特嘅聯賽盃比賽當中碧福特嘅第二個失球。佢就指碧福特根本唔使出迎，因為呢球長傳本身後衛係應該要應付到，但就係因為佢出迎而且出出下又唔出，首先令到佢要做回身呢個動作。然後對方前鋒倒掛一刻佢對手又放喺視線以外（膝頭隔離），令到佢再次撲救時左右手高度唔對稱，即使呢球倒掛技術含量係高，不過碧福特自己嘅準備亦都大大提升咗撲救嘅難度。Margetson 指正如拳手都一定唔會將佢對手放低，因為咁樣會好易比對方擊中，而守龍門都一樣。

愛華頓 對 費列活特 精華 (愛華頓第二個失球 1:29)
https://www.youtube.com/watch?v=pcCR2MZ6ni8

2. 普比
Margetson 就指般尼門將普比嘅 Set Position 因應佢嘅高度而唔會座得好低，呢樣野幫咗普比好多，因為如果佢咁高而仲座到好似碧福特咁低，佢嘅身體其實係好難比到反應。Margetson 認為普比嘅 Set Position 對腳多數都唔會企得太闊，而射門一刻佢對手亦都會放喺膝頭以上嘅位置，相信佢對手嘅位置係喺自己嘅視線範圍內，另外普比有將對手遞向前，同個波接觸一刻保持手臂手腕穩定，從而令到撲救更輕鬆。
而普比企得比較直同高嘅 Set Position 亦都幫助到佢做跳躍動作從而撲救一啲高波或者追身波。Margetson 認為普比膝頭無碧福特屈得咁低，就令到佢對腳更加容易離開草地而做出一啲微細嘅移步或者小跳步，又或者喺一啲緊急情況下直頭可以用腳去擋出射門。

3. 甸軒達臣
最後一位當然就係曼聯門將甸軒達臣。Margetson 認為軒達臣係一位「超級」運動員，因為佢嘅彈跳力同靈活度真係好高，不過佢嘅 Set Position 有時都係好似碧福特咁座到好低，對手都同樣地擺得好低。如果軒達臣可以將對手提高返啲，擺返入視線範圍之內嘅話做撲救就會易啲。

不過 Margetson 就拎返之前曼聯對盧頓呢場聯賽盃比賽入面甸軒達臣嘅其中一個撲救出黎討論。Margetson 就話佢從來都唔係使用 K 腳技巧 (Block Save) 嘅支持者，想當年我地以前踢波嗰陣根本無呢招。佢認為雖然軒達臣第一下右手救得好靚，但既然佢無接實咁第二下就應該全力用手去擒返個波。Margetson 覺得 K腳 雖然喺近代非常流行，不過佢自己就唔會教自己班門將去用呢招，因為佢覺得如果第一下撲救無接實，第二下一定要用手而唔係腳去追個波，因為佢覺得用手去救波嘅機率一定高過靠 K 腳呢個等個波省中你嘅技巧。
曼聯 對 盧頓 精華 (甸軒達臣K腳撲救 1:30)
https://www.youtube.com/watch?v=HEcK757VL24

-----------------------------

睇完 Margetson 嘅評價之後，首先我第一印象係點解講到普比咁好碧福特咁差但都唔建議修夫基用普比取代碧福特呢？不過諗諗下，可能呢篇文本身都只係節錄 Sky Sports 嘅影象訪問，可能無寫低佢覺得碧福特有嘅長處既...咁都唔緊要，同埋佢講碧福特嘅缺點我都幾認同之餘亦都係唔多人有留意嘅細位。

不過，一聽佢講甸軒達臣對盧頓嗰球唔應該用 K腳 應該去擒波我就真係嚇一跳。首先我地9月嘅時候已經拎過一條英格蘭門將訓練片出黎講 Margetson 對於用手救波有幾強逼，明明腳到先都要碧福特用手。嗰陣我已經覺得佢好保守，死都唔肯教同用近代流行而且有數據支持嘅 Futsal 門將救波技巧嘅 Spread Save 同 Block Save。
然而睇返今次佢話甸軒達臣嗰個 K 腳撲救其實都無可厚非，首先軒達臣救出盧頓嘅頭鎚攻門，佢起返身嗰下其實盧頓嘅球員已經再起腳，咁佢又如何可以用手擒波呢？其實呢個情況下用 K腳 Block Save 真係非常正路，雖然軒達臣救唔到呢球補射，但其實純粹係因為佢太緊張令到個成個身體姿勢都扭轉曬，而左腳小腿亦都無打橫完全貼地咁擺出黎，如果軒達臣呢下K腳做得清脆啲我相信呢下佢肯定救得到。相反如果佢嘗試去擒波，我就認為唔太適合，其實係咪真係要咁執著咁食古不化一定要用手呢？

Sky Sports Martyn Margetson 訪問全文
https://www.skysports.com/football/news/18804/12129807/jordan-pickford-nick-pope-and-dean-henderson-assessed-by-england-goalkeeper-coach-martyn-margetson