紐亞失諸交「臂」? 揮臂習慣雙面刃 精選

每位門將都有自己嘅撲救動作嘅習慣，就算未必係最正宗或者甚至係壞習慣，只要佢有足夠能力發揮到嗰個動作嘅作用，其實都無乜理由要逼佢改。
不過有唔少動作其實都係雙面刃黎，例如之前經常提及嘅小跳步，以及拜仁門將紐亞嘅招牌動作揮臂"Arm Swing"。而琴晚拜仁作客薩爾斯堡嘅比賽當中，拜仁失嘅第一球我覺得就正正可以解釋到呢一招 Arm Swing 嘅缺點。

睇返圖解，薩爾斯堡前鋒貝利沙窄角度半單刀面對住紐亞。紐亞原本已經座低個人，兩隻手攤開，兩隻腳同時在地，都係最基本嘅封單刀姿勢。但之後紐亞見貝利沙拉弓嘅時候就使出 Arm Swing，將兩隻手臂一齊向後揮，然後再伸前嘗試憑反應救出射門。可惜最後貝利沙射出一球急勁嘅近柱波，而高度就偏偏係紐亞嘅中腰位，就喺佢嘅大腿同手臂嘅中間穿過，令薩爾斯堡領先 1:0。
其實有睇開紐亞嘅朋友應該都知 Arm Swing 一向都係佢嘅習慣，而車路士門將阿里沙巴拿加同唔少其他門將都會喺迎接射門前做出類近嘅揮臂動作。雖然好多教練都發表過話 Arm Swing 係一個壞習慣，迎接射門前兩隻手係應該要擺前面做好準備。不過！佢地都表示如果佢地嘅門將用呢招係用得舒服而又幫到佢嘅話，佢地係唔會逼佢地去改。因為呢招事實上喺救一啲角度比較刁鑽嘅遠射，係可以靠揮後再揮前嘅反作用力幫到佢地飛撲時伸得更盡更遠，但時機上真係要揮得好準先適用，如果唔係好易變相令門將嘅撲救反應會變慢。

而紐亞失嘅呢球，其實射門前應該已經預計到好大機會只需要迎接一個近身嘅波，但唔知係唔係佢做慣咗呢個 Arm Swing 動作，又或者佢想借呢個動作產生出嘅能量去撲走呢個波，最後令佢兩隻手臂由身後揮返去身前嘅時候已經唔夠時間作出反應，從而放喺最適合嘅位置擋出呢球。因為睇返圖1，我認為如果紐亞用返最正路嘅單刀封位動作，將兩隻手伸直攤開嘅話，其實比起 Arm Swing 之後手臂嘅擺位係有更大機會救出呢個射門。
各位又覺得紐亞呢下 Arm Swing 有無做錯呢？定係純粹非常唔好彩地撲唔到呢？


最尾想利申一下，其實有啲朋友經常誤會我地喺雞蛋裡挑骨頭，明明啲失波係後衛問題但又怪位門將。其實希望大家明白，我絕對認同好多失波未必關門將事，因為一個龍門框咁大，球場上有成22個人咁多變數，加上我地都係普通人類一個，下下都咁完美咩，邊有可能救得曬？

但就算係後衛嘅問題，我都只係想指出如果門將喺啲咩細節位上如果可以再做好啲或者選擇另一個方式嘅話，隨時可以幫後衛補埋隻鑊咁解。如果因為球波係後衛問題，門將就可以乜都唔理求求其其就算，如何做到精益求精？
所以我非常欣賞巴塞門將達史特根曾經講過嘅一句說話，有記者問過佢平時點樣維持自己嘅狀態，佢答：「我每日都同自己講我只係球隊嘅後備門將，要盡力表現同不斷進步取悅領隊比我做正選，咁我就會好有動力每次訓練都比足200%！」即使達史特根已經去到做巴塞正選門將呢個 Level 但都從來唔會因為咁就放鬆而唔去尋求進步。

如果大家出到去踢比賽，明明贏緊 4:0/5:0但突然間失一球令到門將無咗張 Clean Sheet，令到位門將好唔忿氣嘅話，要好好珍惜佢呀！