捉路捉得到就救世 捉錯失波就門將問題 精選

剛剛週末英超就踢咗一場由般尼主場對車路士嘅比賽，賽果最後由車路士以 3:0 勝出，文迪再次保持到不失球係其中一個焦點，但今次想講嘅係般尼失嘅第一同埋第三球。因為我認為呢兩球雖然施耶治同華拿都處理得好好，但如果般尼門將普比可以再做好啲，絕對唔係無得救。
先講第一球，施耶治於右路放直線比華拿，華拿 One Touch 傳中比喺禁區入面嘅阿巴咸，阿巴咸再 One Touch 傳返出去比企喺比較近禁區頂偏右路嘅施耶治。施耶治亦都決定以 One Touch 即刻撞射返一個近柱地波收死普比，令車路士領先一比零。

首先呢個攻勢車路士前面三位球員嘅合作確係好波，幾下嘅 One Touch 其實已經令般尼嘅球員唔係好跟得上，當中包括普比。大家可以睇到其實普比喺施耶治起腳一刻其實企得偏右咗少少，可能因為幾下即彈嘅傳送令佢封位企位有少少偏差，再加上睇埋普比向右橫移嘅動作，睇得出佢應該認為後衛已經幫佢擋曬近柱，加上施耶治嘅射門動作，佢應該一心諗住捉路認為施耶治只可以射遠柱。
而施耶治唔知係唔係真係睇到普比嘅失位，最後射一球近柱地波，雖然角度唔算拎得好盡，速度亦唔算快，但因為普比成個人嘅重心已經去咗遠柱，想翻身救呢球都因為身體動作嘅慣性而返魂乏術，最後只能原地落一落地做下樣咁望住個波入網。

事後英國門將分析師 John Harrison 亦都將呢球射門嘅相關數據 (射門速度，位置，角度，順腳/逆足) 進行分析，計出呢球嘅 xSave 足足有成 0.84，即係根據以往嘅紀錄有 84% 嘅門將可以救到呢球射門。

數據分析上雖然並無包括有隊友阻擋視線嘅因素落去，不過我認同 John 嘅一個睇法就係，即使有隊友好似幫你擋咗某啲射門角度都唔應該捉路，門將嘅工作係令到攻方要以最好嘅射門先可以射破你。就算普比企返貼近柱半步，而施耶治真係決定射遠柱都可能要射得好靚好貼遠柱先入，到時亦都無可能怪普比。但今次呢一球普比嘅企位加上重心一早偏向遠柱嘅關係，令到本身預計普比可以輕鬆接實嘅射門，都變成因為捉路而失去咗令球隊可以暫時繼續同對手打成零比零嘅機會。
第二球蘇馬嘅頭鎚咁靚，加上呢球係後防嘅失誤為主，都無乜野好講架喇。之後就去到第三球，有睇開本專頁嘅朋友應該都成日見到我講「單刀封位 最緊要識停」，而普比又再示範比大家睇呢句點解要成日提。呢球首先由般尼後場長傳失誤開始，比車路士嘅域斯占士攔截成功，之後橫傳比施耶治，而施耶治亦都睇準左手邊嘅華拿空曬一刻就放個直線比佢，最後華拿單刀射個遠柱波彎過普比而入。

單刀黎講，唔怕口臭講多次，個龍門框咁大比人射入就無得好講，但點都要先做好自己。而普比今次就實在太心急，其實華拿控球一刻，控得非常癡腳之餘最近佢嘅後衛亦都有兩三個身位距離，即係代表佢隨時可以起腳。但偏偏普比並無做好準備嘅 Set Position，一路繼續向前移步封位之餘仲唔肯停低，最後華拿起腳一刻普比嘅左腳剛剛提起想向前踏，令到普比當時已經無可能用左腳踩落地做 Power Step 飛去遠柱救呢球。
加上普比無做好 Set Position，成個人嘅重心向曬後，左腳完全凌士，根本無可能做到一個向前嘅撲救同埋唔能夠利用自己身體嘅最大面積去封窄射門嘅角度，令到華拿呢一球遠柱波射到去普比身旁嘅時候，只能嘗試用踩住地下嘅右腳發力，但好明顯唔會夠力去飛撲呢球，最後普比左手伸到盡都係摸唔到波皮，車路士領先 3:0。

如果呢球普比喺華拿控球一刻向前輕微做小跳步封一封位之後立即停低做好 Set Position，令兩腳同時在地，加上身體正面面對射門，以佢隻手嘅長度加上 以左腳做出 Power Step，隨時救到呢球都唔出奇。

雖然好多人都有提過想普比做英格蘭一號門將，但正正可能就係因為佢喺呢啲應對方面暫時仲未算穩定，令佢未能夠喺碧福特手中搶走呢個位置，希望佢可以儘快改善呢啲問題。
講開英格蘭門將，其實同一週錫菲聯對曼城嘅英超賽事入面，錫菲聯門將藍斯度雖然已經屢救險球，但又因為未能救出卡爾獲加嘅遠射而成為眾矢之的，不過佢又係咪真係要負全責呢？有機會再同大家分析呢球。