如果有留意開本專頁嘅朋友，應該都有睇過我地第一個冷知識講關於歐洲賽事裝備規例嘅一個 Post，如果無嘅朋友可以去返下面條 Link 睇返相關嘅講解。
日常冷知識 #1 - 賽會贊助商的陰謀？ https://www.facebook.com/goaliedailyhk/posts/156992862679144
話說點解又拎返出黎講呢，就係因為歐聯歐霸小組賽正式開始，當中又有門將犯咗之前講過嘅手套商標限制嘅條例。
首先就係皇馬嘅古圖奧斯，佢喺主場對住薩克達嘅賽事入面穿上一對 Nike 正常大細商標版嘅 Vapor Grip 3 (Daybreak Pack) 手套，擺明犯曬 20 cm² 嘅規矩，不過好彩之後古圖奧斯都醒目，即刻搵膠帶遮返住個 Nike 商標。明明 Nike 係有出 Vapor Grip 3 (Daybreak Pack) 嘅歐戰落場版，初初我就諗純粹係唔係古圖奧斯唔記得帶呢？但睇埋歐霸嘅比賽之後，我懷疑根本 Nike 就無派貨比班球員....
因為剛剛睇埋熱刺對連斯體育會嘅歐霸賽事，英籍門將祖赫特擔任正選，而佢都一樣戴上呢對 Vapor Grip 3 (Daybreak Pack) 手套，仲要都係正常大細商標版本。而今場之前，祖赫特其實今季已經幫熱刺踢過兩場歐霸外圍賽，而當中都係一樣戴呢對正常大細商標版 Nike 手套，所以今場佢全場一路都無用任何野遮住個 Nike 商標又算正路，唔通歐霸就鬆手啲，歐聯就執得緊啲？
題外話，今場祖赫特其實都打得唔錯，唔知仲有無機會打返入英格蘭國家隊呢？
請按此登錄後留言。未成為會員? 立即註冊