曼聯怕咗愛華頓?羅美路勢將轉投美職聯


之前已經報導過羅美路嘅太太因為曼聯唔放羅美路走而係 Instagram 大發雷霆,但當時仲未知道究竟來龍去脈係點。而英國 The Athletic 嘅記者 David Ornstein 就終於報導實際背後其實發生咗啲咩事。

The Athletic David Ornstein 報導翻譯(節錄)

「羅美路喺轉會窗最後一日嘅大龍鳳,其實主因就係因為曼聯拒絕咗愛華頓嘅借用申請,而當中愛華頓係願意付出二百萬英鎊作為借用費以及支付羅美路嘅所有薪金。

現時呢位33歲門將仲有一年合約在身,週薪為10萬鎊。曼聯一路都企硬要最少收到八百萬英鎊轉會費先肯將羅美路賣出。

羅美路唔單止轉會不成,而剛剛蘇斯克查亦都決定唔會將佢列入歐聯分組賽嘅名單當中,仲要蘇斯克查做呢個決定前係無通知過羅美路,而三號門將嘅位置就由李爾格蘭 Lee Grant 補上。

呢位阿根庭門將喺曼聯嘅處境,由蘇斯克查決定喺足總盃同歐霸盃準決賽選用迪基亞,以及從來無通知羅美路將會回收甸軒達臣返黎同迪基亞爭正選一席位開始變得愈黎愈艱難。

羅美路依家已經無再喺曼聯嘅卡寧頓訓練場到練波,佢其實都明白蘇斯克查嘅決定,但佢仍然希望曼聯可以容許佢離開以獲得更多正選機會。

羅美路其實認為愛華頓嘅報價係非常合理,而佢亦都有信心去挑戰碧福特。但由於曼聯拒絕呢個報價,最後愛華頓就向羅馬租借咗羅賓奧臣,所以令人懷疑曼聯係唔係唔想幫同屬英超嘅競爭對手補強。

不過羅美路其實仲可以轉會去到美職聯,因為當地嘅轉會期會去到10月29號先完結,而似乎亦都有幾間球會對羅致羅美路表示有興趣。」

愛華頓開季四戰全勝確實又真係嚇親唔少人,包括曼聯在內。不過曼聯似乎真係視金錢為糞土,寧願呢年出多10萬鎊週薪比一個四號門將都唔放佢走。希望羅美路唔使再坐多一年等完約先走到啦,不過講開又講原來羅美路都成10萬鎊週薪,我估就算佢肯去美職都一定要減唔少人工先搞得掂...
標籤: 曼聯  羅美路  門將  轉會  美職聯  

留言


請按此登錄後留言。未成為會員? 立即註冊
    快捷鍵:←
    快捷鍵:→