丹麥人有特別嘅接波技巧？話說早前一位美國 YouTuber 及門將教練 Pro GK Academy 嘅 Omar Zeenni 喺佢嘅社交平台到 share 咗一段短片，就係丹麥門將卡斯帕舒米高喺國家隊集練期間，用咗一招好特別嘅上手抱波方法去接波。Omar 表示佢從未試過教人呢一招，不過如果有人用呢一招係成功嘅話亦都唔會叫佢改，最後佢就想問下大家對呢招嘅睇法。
誰不知，Omar 呢條 tweet 竟然引到高人回覆支持卡斯帕舒米高，分別就係前阿仙奴同車路士門將施治，前曼城青訓門將 Gregory Hartley 以及歐洲足協門將教練 A 牌照持有者 Steve Dale 。
施治就表來呢招其實一直都存在，佢指當個波高過肚濟位，而個波嘅速度亦都令到門將準備唔切轉用抱嘅方式去接波嘅時候，就可以用呢招叫做 "High Cup" 嘅方式去接實個波。而 Gregory Hartley 就話見到卡斯帕舒米高由初初加盟曼城嗰陣已經用緊呢招。Steve Dale 就話當佢喺奧咸擔任 Dan Iversen (丹麥 U21 門將) 嘅門將教練嗰陣，佢都係一直用緊呢招，雖然睇落好奇怪，不過佢亦都無嘗試叫 Iversen 去改。因為呢招喺佢身上又真係 work，同埋 Iversen 係用呢招嘅時候亦都只有甩過一兩次手。
之後就愈黎愈多人留意呢一種技巧，最後發覺原來大部分嘅丹麥籍門將都係用呢招去接上手波，從而成為依家各人口中嘅 "Danish Catch" 丹麥式接波。
我第一次睇呢條片真係嚇一跳，明明唔係自己接都覺得心口同肋骨忍忍作痛。平時教練都係教呢個高度嘅波都係用俗稱 W 手嘅方式接波，點會咁樣等個波直接飛去個心口到，再靠轉動前臂鎖住個波架？一來已經覺得有爆肺嘅危機，二來邊有咁好反應即刻鎖得住個波呀，心諗呢招一定係卡斯帕舒米高自己練習果陣玩下試下架啫。點知原來只係自己井底之蛙，there's always something new to learn。
唔知大家又會唔會考慮下次落場嘅時候用呢招呢？等我遲啲即管試下練唔練得成呢招，睇下係咪真係比 W 手穩陣先....
請按此登錄後留言。未成為會員? 立即註冊