艾度阿迪・文迪真係可以解決車路士門將問題？

艾度阿迪・文迪終於落實加盟車路士！
其實呢單都傳咗非常之耐架喇，傳都傳咗一個月冇多，並唔係因為上星期阿里沙巴拿加犯錯所以急急買人。作為施治喺法甲雷恩嘅師弟，艾度阿迪文迪 Edouard Mendy 亦緊隨師兄步伐正式轉會至英超球會車路士，據報轉會費為二千二百萬英鎊。

相信車路士係想借助文迪 197 cm 嘅身高，去減少近季經常於死球失波嘅情況。睇返佢啲球皇片，佢的確幾夠膽出黎接一啲傳出嘅高波嘅 。不過當然佢都有兩個比較致命嘅弱點，第一就係佢腳下功夫比較弱，如果要靠佢由後防開始組織，可能真係要同隊友夾一夾同埋技術上要提升一下喇。另外就係佢即使撲救率唔低，但經常將個波撲出危險嘅地帶，非常容易比對手執死雞，所以隊中嘅中堅真係要非常集中，隨時準備撲救後要幫忙解圍。
坦白講我對文迪就唔係太大期望，初頭可能睇落會比起阿里沙巴拿加好嘅，不過話曬都已經 28歲，有啲基本功同踢法做咗咁多年都未必係一時三刻改變得到，或者施治可能真係對呢位師弟好有信心啦，我地即管睇下文迪可唔可以幫到車路士解決到門將呢一環嘅問題喇。至於阿里沙巴拿加點算好呢？留返下一次再同大家傾！