龍門準備動作的重要性 - 碧福特錯誤示範


教練成日都講,撲救前最重要就係準備動作 Set Position。如果你連準備都未準備得好,你反應幾快彈跳力幾強都無用。

而剛剛一週嘅英超比賽當中,愛華頓主場對住升班馬西布朗。當時仲係比賽嘅初段,雙方仍然未有入球,誰不知西布朗嘅迪安簡拿喺其中一次攻勢當中推下推下去到心臟地帶一路都無人拍埋黎,一於就試下遠射,然後就係咁就一個直飛龍門左手邊嘅遠射收死咗碧福特,令西布朗當時領先 1:0。而呢一球,碧福特就係一個最佳示範話你知點解準備動作咁重要。

呢一球雖然點計都一定係愛華頓嘅後防抵鬧啲架喇,但其實絕對唔係一球救唔到嘅射門。首先迪安簡拿一路推進,碧福特嘅企位同碎步動作本身都無問題,算係準備得唔錯。點知當迪安簡拿起腳嘅時間,碧福特做出一個小跳步之後兩隻腳竟然落咗喺一個仲闊過膊頭唔少嘅位置。當佢兩隻腳掌踩到咁闊,其實有做開運動嘅朋友都想像到,係非常之難去令你可以靠一邊腳去借踩落地下嘅反作用力再飛撲去左邊或者右邊,就算比你飛到都唔方遠得去邊。變相碧福特身體包括雙手同腳能夠覆蓋嘅範圍非常之窄,差唔多只能夠去到雙手同雙腳伸到盡咁闊。

不過如果有留意開碧福特嘅朋友,可能都會發現佢呢個行為其實都唔係呢排先係咁。之前英格蘭國家隊喺 YouTube 上載嘅門將訓練片段入面都睇得出碧福特係慣性地會做出繼小跳步之後踏得闊過膊頭呢個行為。所以我諗就算要佢改都唔係一朝一夕可以改得到,但如果唔諗諗佢,明明啲波救到都變救唔到,仲點做英格蘭國家隊一號門將呀?


如果喜歡我們的文章,請即分享到︰

標籤: 龍門  足球  門將  碧福特  守門員日記  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→