風格與迪基亞完全相反 奧拿拿：新一代全能門將 精選

【 轉會消息 - 奧拿拿 】

千呼萬喚始出來，曼聯正式宣佈由國際米蘭簽入 27 歲喀麥隆籍守門員奧拿拿 Andre Onana，轉會費為五千一百萬歐羅，如滿足附加條件轉會費將可以達至五千五百萬歐羅，合約為期五年直至 2028 年，並有自動續約一季條款。

奧拿拿簽約後表示，佢將會喺嚟緊呢幾年盡佢全力創造屬於自己嘅歷史，對於可以有機會再次同坦哈格（曼聯現任領隊）合作感到非常興奮。

來季喺曼聯將會穿上 24 號波衫嘅奧拿拿喺 2010 年加盟巴塞隆拿青訓並效力五季，並於 2015 年加盟阿積士二隊，2017 年正式成為阿積士一隊成員，同一年坦哈格亦都成為阿積士領隊，所以奧拿拿未加盟曼聯之前其實已經同坦哈格合作多年。
而奧拿拿喺 2021 年 2 月被發現服用禁藥被停賽一年，事後解釋佢只係唔小心食咗太太嘅減肥藥，並唔知當中嘅成份喺禁藥名單之中。阿積士當年全力支持奧拿拿並同佢一齊上訴，最終改判為停賽九個月。

2022 年 7 月，奧拿拿以自由身身份加盟意甲球隊國際米蘭，結束佢喺阿積士七年半嘅生涯。起初佢喺聯賽只係擔任漢丹洛域 Samir Handanovic 嘅副手為主，主力出戰歐聯比賽，直至 10 月正式逐漸成為國際米蘭嘅正選門將。

2022 年世界盃，踢完第一場小組賽之後，奧拿拿突然同喀麥隆國家隊教練鬧不和，直頭唔畀佢入選大軍名單。原因係領隊希望奧拿拿唔好踢得咁進取要保守啲，但奧拿拿堅持自己嘅踢法，所以決定提早離開大軍以及卡塔爾。
上季季尾特別喺歐聯對住 AC 米蘭以及曼城嘅比賽，相信大家都已經大概知道奧拿拿咩料。除咗撲救 Shot Stopping 穩陣唔會太心急，高波主動出迎之外，佢喺後場 Build Up 嘅能力直頭係誇張到癲。

無論短傳同長傳都一樣精準之餘，最重要佢佢完全唔怕對手嘅逼搶，真係可以等到對手逼到埋嚟先做傳球，利用人數優勢將對手嘅逼搶化解，有時仲有能力賣弄一下腳法扭過埋對手之後，為自己爭取時間及空間睇定啲再傳都仲得。

奧拿拿另一樣最癲嘅就係佢完全唔驚用中路傳地波畀前線嘅隊友，佢曾經提過以往有教練叫佢唔好喺中路傳地波，因為一被對手截到就有好大風險，但佢唔認同呢樣係絕對，喺合適嘅時候只要佢有能力就應該做合適嘅事。

而佢喺上屆歐聯決賽正正示範咗幾次，就係傳出一球中路嘅地波直接交畀前線嘅隊友，一下子打穿曬曼城嘅前線同中場線，令到隊友們可以一嚟就直接面對曼城嘅防線，產生出極大嘅威脅。
相信講到呢到，各位朋友都應該了解到奧拿拿將會為曼聯帶嚟一種同以往完全唔同嘅守門員風格，相信唔單止球迷連隊友都會需要一啲時間適應。奧拿拿嘅進取式踢法嘅風險確係唔細，所以有陣痛期就基本。

不過對於坦哈格執教嘅曼聯嚟講，呢種高風險相信會為球隊帶嚟更高嘅回報，所以即使加盟初期有出迎或者傳球失誤亦唔需要無限放大，既然大家都知佢有能力踢成點，與其集中喺少數嘅失誤，不如留意返佢其餘時間成功嗰一百次。曼聯收購奧拿拿，我相信會係一次非常好嘅長線投資。