門將面對單刀一味死衝好蝕底 適當時侯要識收掣

【 衝得嚟要識得停 】

有睇開我地分析嘅朋友應該見唔少我經常喺啲比賽嘅單刀情況都強調守門員最理想地要喺對方起腳前停低,除咗要準備好自己做撲救動作之外,仲可以減低犯規嘅機會。而阿特蘭大對住萊比錫嘅歐霸盃八強次回合賽事當中,主隊門將穆素就係因為單刀被對手吸引到無停低而犯下天條。

當時比賽去到 87” 分鍾,萊比錫嘅保臣交出一球直線畀隊友尼干古,而穆素就決定全速出迎嘗試封位。不過當穆素去到個波面前,佢完全無諗過停低,可能因為見到佢有機會踢得中個波,所以就想成份飛埋去伸隻腳出嚟嘗試篤走個波。

不過尼干古都唔是流的,見穆素全速追出嚟,就喺穆素踢中個波之前自己先篤走個波,令到穆素完全踢空下仲踢中埋尼干古,令阿特蘭大被判罰 12 碼。最後尼干古自己操刀射入,令萊比錫以 2:0 領先,最後亦以總比數 3:1 淘汰阿特蘭大晉身四強。


絕對明白有時救波心切,加上個波對於尼干古同穆素嚟講都算係五五波,會想全速衝出去追得有幾近得幾近,不過都真係要預返收掣嘅距離。

始終單刀點講都係進攻球員較為佔優嘅一方,除非真係 ball out 得好緊要,如果唔係我認為門將都係採取「敵不動我不動」嘅態度較為有利。如果穆素呢球早少少低停低留返少少空間,一來未必會炒低尼干古,二來尼干古如果立即射門都可以做好準備做 Spread 或 Block Save,三來如果尼干古嘗試再推落底線,穆素有機會可以追埋落去,就算追唔到,射門角度窄咗變相入球機會亦會細咗。

而且呢球尼干古隨時真係睇住穆素個勢等到最後一刻先篤走個波,而穆素就偏偏跌咗落佢嘅陷阱。所以衝得嚟要快,但收掣同樣要快,收放自如。
標籤: 門將  守門員  龍門  

留言


請按此登錄後留言。未成為會員? 立即註冊
    快捷鍵:←
    快捷鍵:→