有做開門將或者有留意開我地嘅朋友相信都好清楚一位門將救唔救到一個波，其實由佢嘅準備動作已經略知一二之後嘅結果，而偏偏開住電視睇睇精華多數都只會集中喺射波一刻同門將失手一刻，所以好多人都會忽視咗 Set Position 對門將嘅重要性。之不過，有咩慘得過 Set Position 做到完美，仲要掂到個波但甩手搞到最後都係要失波？而通常咁樣失波，就真係全世界睇住，個個都知你發生咩事，咁就會輸得好肉酸。
面對住腹部以上嘅射門，最正宗嘅接波方式我諗都唔使講太多，有打開龍嘅朋友都知雙手要接實個波，無論高波定左右兩邊嘅地波都係要用一招叫做 「W手」嘅技巧去接波。而正中間嘅地波，就主要係以 K 腳半脆低再用雙手擋住個波然後抱上心口，再借勢向前跌。詳細呢兩招點做喺網上應該可以搵到唔少資源，相信我都唔使再用文字加以說明，所以今次就想調轉集中講下究竟門將喺接呢啲雙手一齊去嘅波當中最常犯同手法或者時機有關嘅錯。
－－－－－－－－－－－
1. 「夾波」
大家要明白話就話「撲波」，但好大部分情況下如果可以雙手接實個波嘅話，門將嘅動作其實伸出兩隻手並以「W手」姿勢等個波飛埋黎對手套到，從而令到門將可以接實個波。而唔少門將間唔中會犯嘅錯就係明明做好「W手」等個波飛埋黎就得，偏偏將兩隻手打開，嘗試用「夾」嘅動作去夾實個波。唔係話唔得，不過時機上要好準確，同埋個波如果落多少少旋，都好易由門將手中漏走。
最簡單直接嘅例子就係上季英超屈福特對曼聯，曼聯失嘅第一球。沙亞近門射一個無力不過極重下旋嘅彈地波，個個諗住迪基亞輕鬆接實，點知佢竟然嘗試「夾」波，好明顯個結果就係預判出錯夾錯位搞到個波漏咗入網。明明呢下佢事前睇準沙亞想射，即刻做好準備動作仲做埋小跳步，準備動作做到足，點知埋牙呢下無啦啦接波變「夾」波...
英超 19/20 屈福特 對 曼聯 賽事精華 (沙亞入球 0:38)
https://www.youtube.com/watch?v=xJp-0L0lNBQ
2. 「無卸力」
另一個令到門將好易甩手嘅原因就係無卸力，就算你嘅 W 手做得幾好，個射門如果子彈咁快咁勁而你就咁伸隻手出去由得個波打落你隻手到，正常物理現象作用力與反作用力，會甩手都係正常不過嘅事。所以有接受過訓練嘅門將實有聽過教練話，要接實個波波就要伸前啲隻手，等個波飛到埋手套嘅時間可以借手臂屈曲嘅幅度向後卸力，咁個波就自自然然會好似落咗膠水咁癡實你對手套。所以接波嘅時候要盡量將兩隻手臂向前伸，提供一個空間比自己卸力，但又唔可以伸到隻手臂直曬，因為咁樣就會鎖死咗手肘個關節位，令到前臂無得向內收而卸唔到力。
例子就係好出名嘅2010年世界盃悲劇，英格蘭對住美國嘅賽事當中門將羅拔格連牛油手，將丹普斯一個軟弱無力嘅射門漏咗入自己個龍門入面。呢球射門雖然途中不停彈地，有機會影響格連嘅判斷，但最後格連唔單止落手落錯位，雙手擺得太近形成唔到「W手」之外，佢完全無諗過要卸力地就咁向下伸出兩隻手，以為咁就可以擋住呢球一個彈地波，加上最後佢仲諗住以「夾」嘅方式去接，加樣野加起上黎想接實個波都幾難，難怪之後嗰場卡比路即刻換走你用占士上陣（雖然結果論兩位嘅表現最後都係不相伯仲...）
2010 年世界盃 英格蘭 對 美國 丹普斯入球精華
https://www.youtube.com/watch?v=QUQFqlgpf_w
3. 「搖擺不定」
最後想講嘅就係門將平時因為練習嘅時候為咗應對唔同情況而需要使用唔同嘅技巧，但當一啲射門夾雜喺佢地學習過嘅兩種技巧中間，就好容易會形成門將搖擺不定嘅情港，最後個撲救動作會變得好難睇，如果失埋波就會令到個情況非常尷尬...
直接講例子，先講上季英超熱刺對曼聯嘅比賽，當中熱刺入嘅一球就係貝格芬嘅射門令到迪基亞大失方寸。當時貝格芬射出一個迪基亞左邊膝頭附近嘅一個波，迪基亞其實已經連 Negative Step 都做埋，準備用右手擋出，但左手唔知點解又突然以反手伸出。令到迪基亞似接非接，似撲走非撲走嘅姿勢，最後擋到個射門都照入網。而呢個都係迪基亞近年愈失愈多波嘅其中一個原因，就係因為佢除咗傳統嘅單刀技巧以外仲精通埋 Futsal 五人足球嘅技巧，令到佢係唔同情況下有唔同嘅招數應對，而對付佢嘅最佳方法就係射一啲唔上唔落嘅波，等佢身體判斷唔到用邊一招技巧，咁就會形成迪基亞呢一球嘅錯誤。所以學多幾招傍身絕對係好事，不過一定要練得好足，訓練時期要面對愈多唔同嘅情況，落到場身體嘅自然反應就會識得揀當時最佳嘅技巧應對。
英超 19/20 球季 熱刺 對 曼聯 賽事精華 (0:04 貝格芬入球)https://www.youtube.com/watch?v=ZGIeLgJY0mE
第二個例子就係上季英格蘭足總盃，車路士對住利物浦嘅賽事。當中阿祖安再次頂替艾利臣正選上陣，當時法賓奴喺禁區頂比巴克利逼甩咗個波，之後個波去到韋利安腳下，控咗一下就喺禁區頂施射。最後阿祖安使出一個似抱非抱，似撲非撲嘅動作，個波最後打中佢腹部折射入網。入咗之後佢仲話雲迪克遮咗佢視線所以睇唔清楚，但睇返慢鏡其實韋利安射門一刻雲迪克已經縮開咗，而且睇埋佢「撲」之後隻左腳無啦啦跪低埋，就知佢本身成個人嘅重心同身體平衡亂曬，加上咁奇怪嘅手法，救到先至出奇。
英格蘭足總盃 19/20 車路士 對 利物浦 賽事精華 (2:36 韋利安入球)
https://www.youtube.com/watch?v=ohSK9ciol6k
最後一個例子同樣係一個球壇悲劇，而呢件事令到呢位門將到依家都翻唔到身，就係利物浦門將卡利奧斯喺 17/18 球季歐聯決賽對皇馬當中甩手嘅一球。
當時加利夫巴爾左路推進，無人壓逼下就射一球有少少飄但唔算角度刁鑽嘅射門，卡利奧斯當時就處喺一個又想接，又想打出嘅心理狀態，因為首先可以睇到佢兩隻手掌都係打開而並唔係伸出拳頭，但佢手臂嘅動作並唔係想撥橫而係向前，正路就係一個想向前打出一個有力量射門嘅動作黎，再加上佢垂直跳起咗令到佢身體正處於一個唔太平衡嘅狀態，最後隻手亦都放錯位只能夠掂到個波嘅右半部分，種種原因加埋就令到卡利奧斯撲救失敗，將呢個射門漏入網內，從此卡利奧斯嘅足球生涯就變得不一樣（陰公到依家連外借到去德甲嘅柏林聯都無正選...) 雖然有傳聞比賽期間佢可能受到腦震盪嘅影響，令到佢表現失準，但首先由於佢有無腦震盪呢件事我地無辦法考究，實在評論唔到，而睇返佢其餘時間嘅表現其實間唔中都有呢啲手法同時機混亂嘅情況出現，只不過可能因為無失波而大家無留意到咁解。
歐聯 17/18 球季決賽 皇家馬德里 對 利物浦 賽事精華 (巴爾第二個入球 8:56)
https://www.youtube.com/watch?v=9cOtR4fvWKE
－－－－－－－－－－－
所以講到尾，做一位門將其實真係一門好深嘅學問，由射門前嘅準備，撲／接波一刻嘅手法同時機，到之後如果接唔實嘅翻身動作所有野都對一位門將好大影響。而所有野其實都可以憑住練波去浸返黎，練習嘅時候唔好怕失波，因為失得愈多你就愈知道自己有咩不足，就更加要練得更多。特別係手法同時機，唔好依賴曬啲龍門手套乳膠嘅性能去幫助，因為咁樣只係治標唔治本，講到尾練好自己嘅技巧先係最重要！
請按此登錄後留言。未成為會員? 立即註冊