達奴 - 紐卡素首席門將的心路歷程


紐卡素門將達奴自從球會首席門將杜巴卡喺上年年中受傷之後就一路坐穩一號門將呢個席位,而 Sky Sports 記者 Johnny Philips 就襯住紐卡素作客阿仙奴之前同呢位英籍門將做咗個訪問。

---------------------------------------------

達奴 Sky Sports 訪問 (節錄):

達奴指「大家可以見到愈黎愈多小朋友因為各種原因而鐘意做守門員。做守門員可以左飛右撲撻黎撻去其實都幾好玩架。」

達奴已經加盟咗紐卡素6年半有多。之前佢曾經係球會 16/17球季嘅首席門將,當年嘅教練仲係賓尼迪斯,而當季達奴取得13張 Clean Sheet 之餘紐卡素最後更加贏埋英冠升返上英超。

不過佢去到依家先真正成為一位英超球會首席門將。達奴好好把握杜巴卡嘅傷患去表現自己,令到大家喺呢半季英超都對佢讚賞有嘉。

達奴同 Philips 講:「我等咗呢個機會好耐喇。」

「當然之前我一路都唔敢肯定呢個機會會唔會出現,所以我一路唯有比啲耐性自己,盡力去練波,等有機會黎到嘅時候我可以話比領隊聽我已經準備好。當我加盟紐卡素嘅時候,我已經想證明比人睇我係絕對有資格為呢個球會上陣。」

達奴係一位90後,8歲嘅時候曾經效力過阿士東維拉,之後轉會去到諾定咸森林,20歲嘅時候仲終於為森林地標上陣。

「細細個嘅時候舒米高係我嘅偶像,之後就係 Top Fit 嘅祖赫特。首先佢同我一樣係英格蘭球員,而佢當時真係好勁,之後仲幫曼城贏埋英超,所以我成日都留意佢。曼城第一次贏英超嗰一季,祖赫特真係勁到癲,所以佢對我嘅成長有好大嘅影響,令到我成為一位更加成熟嘅門將。」

而達奴嘅好表現其實同好幾位非常出名嘅門將教練有好大嘅關係。

「當我喺維拉嘅時候遇到 Andy Quy 同 Eric Steele,教識咗我好多唔同嘅技巧。之後去到森林就有 Steve Sutton,佢盡力令到我變成一位更加全面嘅球員。然後黎到紐卡素就遇到經驗老到嘅 Simon Smith。所以我曾經經歷過三個唔同嘅階段,而每個階段遇到嘅教練就正正幫咗到我成為到今日嘅我。」

杜巴卡早前已經正式復出,而三號門將基利士比 (Mark Gillespie) 亦都唔會放軟手腳,不過達奴指出呢個首席門將爭奪戰雖然非常激烈但絕對係良性競爭。

「我同幾位門將嘅關係都好好。基利士比今季黎到紐卡素一隊,踢過幾場盃賽都表現得唔錯。然後杜巴卡又終於傷好仲踢咗一場足總盃賽事。我地個個都做得好好,大家嘅狀態都一樣咁 Fit。Simon Smith (紐卡素門將教練) 亦都係一位非常好嘅教練,佢令到我地幾位門將可以互相支持同鼓勵對方。

「大家都知道其他隊友喺練波嘅時候態度都非常好之餘亦都想互相幫助,絕對唔會偷懶。而呢個狀態同心理質素其實已經維持咗三至四年,就算之前艾利洛 (Rob Elliott) 仲係到嗰陣都一樣。個個練波都好盡力,見到大家都咁認真對待呢件事,真係夫復何度?呢到無人會想拖人後腳或者想搞串個 Party,實在非常之好。」

達奴指佢自己成日都會自我分析。有唔少門將會因為咁而令到自己表現愈黎愈差,但偏偏對達奴黎講咁樣先至係佢嘅動力來源。

「我真係會每樣細節都留意。每次比賽完咗之後,我都會記得曬我幾時掂過個波、斬過嘅波、每次嘅手鎚同埋失咗嘅波。不過呢樣野完全無影響到我,反而咁樣先幫到我放得低然後重新出發。我清楚知道我有咩做得好,有咩我可以做得更好令自己進步。」

武漢肺炎對足球界嘅影響非常之大,而紐卡素亦都絕對避免唔到。曾經有唔少嘅球員都需要一段長時間先康復。雖然達奴暫時仲好好彩未試過中招,不過無咗主場球迷支持都令佢唔多唔少有啲失望。

「我真係好掛住咁多位球迷,呢樣講幾多次都唔夠。我地真係好想當情況好啲嘅時候可以盡快比返球迷入場支持我地。當我喺對曼聯嘅比賽入面救咗般奴費蘭迪斯嘅12碼嘅時候,如果有球迷入場我肯定啲尖叫聲一定可以幫我地喺呢場比賽到得到更好嘅結果。我地真係好掛住班球迷,希望佢地可以盡快入場支持球會。」

早前紐卡素對住錫菲聯嘅比賽,紐卡素再一次因為12碼而令球隊失波。令到達奴未能夠成功守和利物浦之後再一次拎到 Clean Sheet。
東北部嘅記者們不停地指出達奴下一次國際賽週嘅時候應該要入選英格蘭國家隊。而修夫基都應該好想搵到一個狀態好嘅門將幫佢地把守最後一關,而達奴都承認佢終於會開始諗下入選國家隊嘅事。

「呢個係我嘅目標而我當然好想達成。而呢件事亦都一直推動我要將表現維持到喺高嘅水平。我真係好想入選國家隊,不過依家我只係會集中諗點樣可以保住球會首席門將呢個席位,不過當然我希望可以一路順利到底,好好享受呢個過程同埋即管睇下將來會點發展。」

---------------------------------------------

睇完呢篇訪問我感覺到達奴係一個好謙虛同非常努力嘅球員,雖然佢已經唔後生但一路維持到有咁好嘅心理質素,一路無放棄進步,為自己嘅夢想努力,絕對值得大家參考。大家又覺得佢值唔值得繼續做紐卡素嘅正選門將同埋入選英格蘭國家隊呢?

達奴 Sky Sports 訪問原文
標籤: 英超  紐卡素  達奴  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→