迪基亞明顯弱點 - 對上40球12碼全部未能撲出 精選

【迪基亞同救12碼似乎大纜都扯唔埋？】
歐霸盃決賽最後由維拉利爾憑互射12碼擊敗曼聯成功奪冠。當中射失12碼同一球都撲唔走嘅迪基亞再次成為話題人物。

睇返紀錄，迪基亞對上一次撲出12碼已經係 2016年4月23號於足總盃賽事撲出當時仲效力緊愛華頓嘅盧卡古主射嘅12碼。

https://www.youtube.com/watch?v=l0dIzz-IybA

由當時去到歐霸盃決賽前，迪基亞一共失咗25球法定時間內嘅12碼，加埋2018年世界盃對俄羅斯互射12碼失嘅4球，已經足足有29次未能撲出12碼。

https://www.youtube.com/watch?v=bHrEhuR1gEU

而今場互射12碼維拉利爾嘅11球全部射入，包括埋齋嘅門將魯利。所以迪基亞其實已經連續失咗40球12碼，真係一個聽到都唏噓嘅數據。
https://www.youtube.com/watch?v=BNle2W5Io_4

但其實40球入面迪基亞唔係未試過捉啱路，亦唔係未試過拍到個波，只不過最後個波都仍然飛入網。技巧方面有人提過迪基亞嘅步法唔夠好，往往佢嘅 Power Step 都踩得唔夠出令到佢嘅覆蓋範圍唔夠闊。

但其實又唔係未見過其他門將都使用類似嘅步法但同樣救到12碼，所以難以令人唔去諗係唔係佢喺救12碼時候嘅心理質素唔夠好？一位球員嘅精神面貌同埋表現絕對可以反映到佢嘅自信程度去到邊，就算唔講迪基亞今場撲唔到嘅11球，佢射失嗰下無論助跑同埋門質素，確實令人有一種佢自己都無乜信心嘅感覺。
但其實自從迪基亞三月短暫離隊，歸隊成為盃賽門將之後，表現同狀態確實有所提升，所以今場繼續出佢而唔出甸軒達臣實屬正常不過嘅決定。無論迪基亞下季留隊定離隊都好，希望佢可以重拾自信再次畀到好表現大家睇。依家先30歲，門將生涯黎講其實先剛剛踏入黃金期啫。

最後想講其實都樂見賽後唔多人太過怪責迪基亞，始終12碼運氣佔大多數，進步空間一定有，但比賽結果怪罪曬落門將到就一定唔公平。