迪基亞又「犯錯」?清道夫門將問題分析


早兩日有位網友 PM 我,問我點睇迪基亞對烏克蘭球失波,坦白講我都係事後睇返精華先知發生咩事。同呢位網友傾傾下,都發覺呢一球波其實都值得拎出黎同大家討論一下。

事源就係歐國聯賽事,由烏克蘭主場對住西班牙。比賽去到76分鐘仍然維持 0:0,然後烏克蘭嘅耶莫蘭高就喺中圈附近一路打橫推,搵到前面嘅迪山哥夫,一個直線放落去由得佢哨。點知迪山哥夫控咗一下之後,鏡頭就影到西班牙門將迪基亞企咗係近禁區頂嘅位置,迪山哥夫就直接射返佢近柱,彎過咗迪基亞入網。最後烏克蘭就係憑住呢球入球以1:0小勝西班牙。

睇返賽後都唔少人茅頭直指迪基亞,話佢無啦啦企係嗰個位做乜,指如果守龍嘅係車路士嘅阿里沙巴拿加,一早比人X到撻皮,所有社交平台都會有佢嘅蹤影咁話。而西班牙教練安歷基賽後就力撐迪基亞,話啲人鬧迪基亞鬧到上曬癮,明明一個失球係全隊一齊負責任。咁我初初睇完失波嘅精華,就嘗試睇多幾次本身耶莫蘭高未交出直線之前迪基亞嘅企位,然後發現其實當時迪基亞並無話企得太過出,因為西班牙嘅 Highline 打法,令迪基亞即使唔擅長都要擔當一位清道夫門將 Sweeper Keeper。當耶莫蘭高交出直線嘅時候,唔知係咪迪基亞實在好少做呢個角色,迪山哥夫控球前迪基亞仲想衝前睇下可唔可以出迎,當迪山哥夫控得球波咁靚嗰陣,迪基亞先準備返轉頭向後移。但一切已經太遲,令到迪基亞企嘅位置唔上唔落,迪山哥夫有排都未入到禁區之餘亦已經可以隨時起腳嘅關係,迪基亞既唔可以背住佢向後跑又唔可以出迎,最後落得如斯田地,迪山哥夫輕鬆射一個彎近柱嘅波就收死咗迪基亞。

當然迪基亞呢一下出迎時刻可能揀錯咗,如果佢預判到耶莫蘭高交波路線同力度,正路就會即刻開始回後,咁嘅話呢球可能都仲有得救。只不過都想講返一來迪基亞並唔係打開清道夫門將呢個角色,二來我認為西班牙嘅中後場都唔應該比烏克蘭有咁大自由度去造波,從而幫助減低對方前鋒對後防線嘅壓力。
其實清道夫門將一向都好容易出現呢啲因為企位錯誤,對方一個反擊就突然輕鬆射入嘅情況。呢球令我諗起上季歐聯曼城對里昂嘅賽事,艾達臣都係一位出曬名嘅清道夫門將,而佢喺呢場波頭兩球失波就係同樣嘅狀況。對面一個過頭波斬過黎比前鋒去哨,艾達臣由於本身已經企得好前,令到佢出迎又唔係行後又唔係,唯有企係原地,令到艾達臣喺完全失位下,被對方前鋒輕鬆收死。

清道夫門將對於強隊打 highline 一定有幫助,始終門將同後衛如果中間嘅空位太過多,只要對方前鋒有把握憑速度壓過自己隊嘅後衛就會好危險,所以先要靠清道夫門將去將放落呢個空間嘅波幫忙解圍。只不過如果對方嘅傳送係恰到好處,而門將稍有猶疑就好容易跌入迪基亞同艾達臣嘅處境。
你地又點睇呢一球失波呢?迪基亞係咪要負全責?定覺得西班牙中後場同樣應該要負上責任?
歐國聯 烏克蘭 對 西班牙 精華:
19/20 歐聯 曼城 對 里昂 精華:

如果喜歡我們的文章,請即分享到︰

標籤: 門將  出迎  西班牙  迪基亞  曼城  艾達臣  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→