身價跌至1百萬鎊的前英新星 畢蘭特今週大打爭氣波

【 大打爭氣波嘅前英新星 - 畢蘭特 】

大家仲記唔記得畢蘭特呢位曾經喺碧福特未冒起之前,被吹捧為接祖赫特班成為英軍未來十年守門員鐵膽嘅門將呢?當年畢蘭特效力伯明翰嘅年代實力已經不俗,仲曾經拒絕加盟車路士,全因希望可以有更多正選機會。
被伯明翰寄予厚望嘅畢蘭特最後喺 2013 年 1 月加盟史篤城,但當時佢都只係成為球隊嘅三號門將,排喺比高域以及蘇連遜之後,所以為咗得到更多出場機會,經歷咗兩季外借嘅生活。但由於史篤城之後將比高域出售,加上畢蘭特外借表現得到認同,終於喺 2015 年成為當時領隊曉士嘅首席門將。

畢蘭特喺史篤城嘅表現備受球迷嘅讚賞,更一直有份入選英格蘭大國腳,唔少球迷都睇好佢可以取代表現開始下滑嘅祖赫特。可惜球隊最後喺 17/18 球季降班,但畢蘭特仍然決定留喺史篤城於英冠作賽。不過佢喺英冠嘅狀態以及表現相對不穩,曾被幾位後備門將短時間頂替,最後佢亦都係 2020 年 10 月以一百萬英鎊身價離開史篤城加盟英超球隊水晶宮,成為古亞達嘅副手。

加盟水晶宮到今日都未曾上陣超過十場嘅畢蘭特,今個星期終於有機會連續上陣。不過於上星期對住米禾爾嘅足總盃賽事,就係因為佢喺禁區控甩波被對手先開紀錄,好彩隊友生性最後能夠反勝 2:1。

不過韋拉似乎仍然對畢蘭特好有信心,於剛剛對白禮頓嘅英超賽事當中再次派佢上陣。而畢蘭特亦都無令韋拉失望,成功做出幾個非常精彩嘅撲救,包括救出一球 12 碼,令水晶宮成功保得住一分。

上半場首先畢蘭特已經以 Spread Save 用腳成功擋出托沙(圖2寫錯咗慕比 🙌🏻)嘅單刀,之後再救出哥斯嘅 12 碼,上半場成功保住不失。



之後更加有一段 VAR 小插曲,白禮頓角球攻勢。丹般迎頂後,畢蘭特嘗試接實,之後慕比將個波撞咗入網。但 VAR 睇返重播發現畢蘭特其實已經喺慕比掂波前雙手接實咗個波,然後慕比再成份撞埋畢蘭特到,撞甩埋個波,最後入球被判無效。呢球全靠畢蘭特夠曬勇,望住慕比衝埋嚟都接咗先,如果佢無完全控制個波,隨時都無得吹返轉頭。


下半場白禮頓又有一次半單刀機會,今次輪到莫達處理。由於係一個彈地波,令畢蘭特難以出迎,不過佢都好冷靜,守住位置等莫達出腳後再畀反應,最後成功以 Top Hand 擋出。


可惜最後都係日防夜防家賊難防,慕比左路地波傳中,畢蘭特已經轉身併步想對返中路嘅對手。點知企前柱位嘅自己友安達臣將個波篤向龍門方向,令移緊步嘅畢蘭特擋都擋唔住,仲畀安達臣通埋自己大細,就係咁水晶宮被逼和 1:1。


雖然最後都係要失波,不過今場畢蘭特嘅表現總算將上週足總盃失誤嘅烏氣吐走。之後水晶宮會繼續用佢定係古亞達仲係未知數,但畢蘭特如果可以繼續保持到今場嘅表現,對水晶宮嚟講隊內有良性競爭一定係好事。聽咗佢個名咁多年,其實依家先 28 歲,隨時踢下踢下仲有得同樸比、莊士東同軒達臣爭下國家隊嘅門將位置都唔奇,繼續努力啦。
標籤: 門將  守門員  龍門  

留言


請按此登錄後留言。未成為會員? 立即註冊
    快捷鍵:←
    快捷鍵:→