誓不放棄的保方接班人 佩連裝備自己 靜待機會

【 「保方接班人」誓不放棄 】

保方雖然仍然未退休,但始終年紀已經唔細咗好多年,所以由好耐之前其實一路都傳出唔少「保方接班人」,而今日嘅主角佩連就係其中之一。

2018年保方離開祖雲達斯加盟 PSG,老婦人就簽入佩連呢位熱拿亞嘅25歲新晉門將,大家當時對佢嘅期望都唔細,唔單止期望佢可以「取代」保方喺祖記嘅位置之餘仲希望日後可以成為意大利國家隊正選。

可惜佩連第一季效力祖雲達斯嘅時候受到傷患困擾,令佢全季只有為球隊上陣 9 場咁大把,大部分時間球隊都派出舒捷斯尼成為正選門將。

2019 年 7 月佢曾經有機會加盟賓菲加,點知因為膊頭傷患未能通過體測,而保方亦喺同一個轉會窗重返祖雲達斯,令佩連嘅情況更加尷尬,球隊位置更加被賓索基奧爬頭,成為球隊嘅四號門將,連歐聯大軍名單都無份入選。

去到 2020 年 1 月,為咗得到出場機會,佢決定短暫外借加盟母會熱拿亞,而亦因為表現唔錯所以喺下季(即 20/21 球季) 同樣再次外借至熱拿亞提升自己嘅比賽狀態,最後佢更加以 +5.2 排喺意甲嘅 PSxG +/- 榜首,表現令人眼前一亮,好似終於做返加盟祖雲達斯之前嘅自己一樣。

外借完成後佢重返祖雲達斯,雖然佢今季仍然未能搶返球會嘅正選位置,而且暫時只係上陣 9 場,但都錄得 7 勝 2 負嘅佳績。而前一日喺對住費倫天拿嘅意大利盃四強次回合比賽,佢更加作出幾次關鍵撲救協助祖雲達斯晉身決賽,將會同國際米蘭爭冠軍。

其中一球關鍵撲救嚟自費倫天拿嘅角球攻勢,當時開出一個外彎球。佩連見到佢無可能出迎下,立即褪後幾步企返喺底線前為自己爭取額外嘅反應時間。當費倫天拿嘅馬天尼斯迎頂前,佩連已經停低準備好,並做出小跳步隨時調整身體重心。

馬天尼斯成功頂中個波後,點知省中祖雲達斯後衛迪列特個頭改變方向,而佩連當時做完小跳步後其實已經雙腳同時落地,因為原本攻門嘅路線係偏向中間,點知省中迪列特變相飛向自己嘅右手邊。而佩連就把握自己褪後咗幾步嘅距離以及時間,立即抽起右腳轉移重心向右邊,而且仲有足夠時間將右腳放返落地做 Power Step 動作起跳,最後成功將攻門撲出。


呢球如果比著無乜比賽狀態嘅門將,除咗未必識得褪後之餘,亦未必可以喺咁短時間內重新調整自己嘅重心,而且仲可以喺小跳步後落埋內腳加力起跳,實在唔簡單,證明佩連呢球非常集中之餘,平時練波絕對唔馬虎。
之後費倫天拿亦都有幾球近距離射門被佩連極速反應擋出,雖然唔能夠接實或者擋出底線,但最緊要係個結果,就係撲得走個波無畀個波入網,a save is a save。


其實喺早一個星期佩連已經動筆同祖雲達斯續約至 2025 年,喺賽後佢表示:
「呢個禮拜對於我同球會嚟講都非常完美。我地嘅目標就係要打入決賽,我地仍然想留喺聯賽榜頭四,我地聽日返到訓練場又會繼續努力過。」

「其實續約呢個決定並唔易,睇落好似好簡單但其實係一個好有野心嘅決定。即使只係能夠上陣幾場比賽,效力祖雲達斯都比起喺其他球隊穩定地上陣意義更大。」

「以冠軍為目標呢件事比起有多啲上陣機會但無能力爭勝更有意思,所以我決定續約就係咁解。」

無一位守門員明知自己有能力落場但仍然會享受做球隊嘅後備無得上陣,即使佩連呢一刻未必喺祖雲達斯嘅正選,但相信佢仍然會繼續憑呢份「野心」裝備好自己,做好準備迎接任何一個隨時出現嘅機會。

如果喜歡我們的文章,請即分享到︰

標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→