英超快車由狼隊主場對住車路士，當中車路士嘅入球柏捷斯奧犯上輕微 Set Position 嘅錯誤令車路士領先，大家可以去我地嘅 Instagram 睇返 Story 入面嘅簡短分析。不過今次呢個 Post 嘅主角係車路士嘅門將文迪，因為佢近期狀態認真低迷。
今次想講嘅係佢呢場嘅第二個失球，當時已經係比賽嘅補時階段第95分鐘，狼隊嘅柏度尼圖喺左路推進對住車路士嘅蘇馬。當尼圖仲喺禁區頂一刻，畫面已經見到文迪企咗喺小禁區頂。尼圖一路推而蘇馬都無貼身比壓力佢，咁尼圖推到入禁區內就立即射一個遠柱地波。當時文迪仍然企喺小禁區頂，喺個波嘅球速都算快嘅情況下文迪只能盡力伸出左腳嘗試擋出呢個射門。不過當然最後佢喺完全掂唔到個波嘅情況下，比尼圖射穿自己，令狼隊最後以2:1擊敗車路士。
如果有睇我地嘅「門將技巧 101 第二回 - 單刀 (上)」 嘅朋友都會明白呢球定義上都算係一球單刀黎，因為波同兩條門柱之間只係得返文迪一個。而文迪其實呢個企位就係使出咗片中提及最低效率嘅 Engage & React，即係出迎但又出唔曬想靠反應做撲救。首先以尼圖呢個射門角度同距離（~17碼)，其實文迪企近底線同企到出小禁區頂其實喺封窄射門角度上根本唔會差好遠。但係相反咁樣企前咗幾步就令到佢對呢個射門可以作出反應嘅時間大大減少，變相文迪明明手長腳長，個射門又唔係離佢好遠，最後連波皮都掂唔到。
https://youtu.be/t9R3MCgWUlo
呢球其實文迪係應該使用 Wait & React 企近底線去爭取反應時間，除非尼圖再推落去入到去離門14碼以內咁文迪就真係應該要出迎使用 Block Save 或者 Spread Save 喇。而文迪輕出呢個問題其實喺對上兩場都已經有發生，分別係對住愛華頓出迎錯誤撲跌卡法路雲輸12碼，以及對住列斯聯嘅班福特過早出迎令班福特輕鬆推過自己最後射入空門。其實以文迪嘅反應，加上佢又手長腳長，如果佢肯冷靜啲睇定啲先出迎其實真係好難射得穿佢，所以佢呢個輕出嘅問題真係要正視下，如果下下咁輕出真係有排佢輸，可能林伯特心諗「唔係真係連英超都要出施治下話？」
請按此登錄後留言。未成為會員? 立即註冊