英超門將單刀應對搞乜鬼?原本已處下風再衰多兩錢重


輸單刀從來9成都唔關門將事,大佬個框咁鬼大一個人點守得曬?不過如果明明都未輸,位門將都自動投降成個動作教埋對家點射,明明射得唔靚係有可能救到嘅波都因為門將嘅準備不足而輸就真係會令球迷更加失望。而剛過去嘅週末英超就有幾球例子想同大家分析一下。

最多人留意嘅其中一場一定係曼聯大敗比熱刺 1:6 嘅賽事,首先呢6球基本上責任都係後衛居多架喇,詳細大家可以睇返相關精華,而當中我想探討嘅係孫興慜嘅兩球入波黎講一講迪基亞嘅準備動作。

首先睇返圖1,就係孫興慜嘅第一個入球,可以睇到迪基亞嘅「K腳」Block Save 技巧其實做得唔差,兩隻手張開,右腳踩曬落地,左腳屈曲後同右腳嘅距離亦唔算好闊,但偏偏孫興慜推最大步一下佢無選擇全速出去封位,而且佢打側咗個身,令到佢未能夠進一步封窄射門嘅角度。

然後圖2就係孫興慜嘅窄角度射門,唔知係咪當時已經失咗3球失咗信心嘅關係,呢球迪基亞嘅「K腳」比起圖1嗰球做得更差。首先佢照舊打側咗個身,然後孫興慜起腳一刻佢嘅雙腳應該因為前一刻做緊小跳步所以仍然喺空中,提升咗令到佢做到同射門相關反應嘅難度,最後就係左右腳嘅距離太闊,種種原因令到呢球本身應該救到嘅波都變成失波。

然後就講另一場又係嚇一跳嘅賽事,利物浦作客大敗比阿士東維拉,最後比數為阿士東維拉以7:2勝出。賽前已經得知艾利臣因為訓練期間同隊友相撞而要休息4至6個星期,相信利迷們聽到呢個消息個心都已經離一離,因為無咗艾利臣不得止仲要用上阿祖安黎講,想唔擔心先奇。而阿祖安亦都如大家所料,真係出事,仲要一開波輸嘅第一球就奶野。

首先佢接應羅拔臣嘅回傳,然後佢拖咗一拖想交比右邊嘅高美斯,點知太大力高美斯接應唔到之餘仲比維拉嘅基利殊拎埋並傳中比屈堅斯,屈堅斯單刀對住阿祖安輕鬆射成 1:0。呢球首先阿祖安傳失已經好大問題,明白佢認為屈堅斯封住咗高美斯嘅傳球路線,所以想比一個後少少嘅波高美斯去追,但個力度錯曬益埋基利殊。之後基利殊傳中比屈堅斯,參考返圖3,我諗阿祖安個腦已經心諗「X 又奶野 點解又係咁」,搞到屈堅斯明明控到個波停咁濟,但阿祖安仲仍然繼續死衝爛衝唔停低,最後屈堅斯其實只係射一球腳邊波就已經收死根本無做好準備動作嘅阿祖安。之後嘅6球波,雖然有唔少係折射或者未必救到嘅波,但一開波輸球咁樣衰嘅,想隊波有士氣都難...

最後想講嘅係李斯特城嘅卡斯帕舒米高,呢場李斯特城最後輸0:3比韋斯咸,而圖4就係佢地失嘅第2球。基士維一個大腳踢向前,科奴斯成功突破越位陷阱之餘仲拎得鬼咁死靚。一路推一路推,最後射近柱入網,令李斯特城當時落後 0:2。呢球卡斯帕舒米高嘅問題個人覺得無之前兩位咁大嘅,不過都有可以進步嘅空間。

首先我覺得卡斯帕舒米高呢球實在太過保守,因為科奴斯位置上唔正中之餘右邊其實有蘇恩祖幫手頂住佢無得轉向右邊,所以卡斯帕舒米高應該要襯佢未入禁區已經要諗定出迎封窄科奴斯嘅角度,不過最後佢選擇企返喺原地做準備。之後科奴斯臨起腳前一下嘅盤球,卡斯帕舒米高作出一個小跳步去重新整理佢嘅企位對返住科奴斯,但呢一下嘅小跳步感覺上已經遲咗半秒,令到科奴斯出腳一刻卡斯帕舒米高嘅重心仍然擺向緊龍門嘅左手邊,最後卡斯帕舒米高面對住呢球近柱嘅射門只能夠伸一伸隻腳嘗試去擋,但當然最後唔成功。

單刀失波怪曬落個門將就一定無可能架喇,等於之前我都話 Clean Sheet 從來唔單止係一位門將嘅功勞。只不過既然上到英超呢個 Level,大家都要明白一點,盡咗力唔會有人怪你,但首先真係要做好自己先。做一位門將除咗技術之外,最講求嘅就係要冷靜 冷靜 同埋 冷靜。分析上每一步雖然睇落好微細,但其實一個神救或者錯誤,就係靠呢啲微細嘅部分去分辨你係一位好嘅定差嘅門將,做人對自己無要求又如何進步呢?

如果喜歡我們的文章,請即分享到︰

標籤: 門將  單刀處理  失球  守門員  撲救  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→