艾達臣回應利曼大戰驚險鏡頭:一切盡在掌握中

【 我都未驚你驚? 】

之前出過post講利曼大戰艾達臣藝高人膽大嘅白界線傳球,一切都喺佢計算之內。近日艾達臣接受訪問時回應就話當時一切盡在掌握中。

「我當時想傳去左閘位,但見到阿諾迫緊簡些路,所以我再等多等,個波係碌緊去白界,當我見到拿樸迪走位俾條線我,我輕鬆就傳到個波出去。」

「賽後我收到好多朋友同我講佢地爭啲心臟病發,其實場內嘅睇法同場外作為觀眾好唔同。」

「我一路掌握住整個狀況,個動作睇落去好危險,但我一如既往地平靜。」

「我經常都保持平靜,我唔會特登作冒險盤扭之類,有時睇落某啲危險關頭有機會導致對手入波,但其實我都盡量踢得簡單啲。我班隊友都知道,我喺果啲moment其實好冷靜。」
「當然我明白大家睇到都會感到壓力,哥帥同我提過好多次,當我受壓時通常都會搵到解決辦法,我班隊友會走位拉空為我提供傳球路線。呢套打法對我嚟講好平凡,我由細到大都係咁樣踢波。我細個踢開futsal,對我往後職業生涯好有幫助。」

「我哋作為職業球員,有時都會失敗,但最重要係從錯誤中學習同時保持頭腦冷靜。我職業生涯都曾經犯過唔少錯,而我可能會犯下更多錯,同時我會想辦法喺心理上準備好自己,唔會俾佢哋影響到我。」

「無論我做我啱定錯,我都保持冷靜,呢樣係足球一部分。如果做得啱會有人讚,做錯咗就有人彈,但我唔會俾批評影響到自己或因讚賞而飄飄然。」

如果喜歡我們的文章,請即分享到︰

標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→