艾利臣完場向碧福特「致敬」 利迷條氣順返曬

【 艾利臣向碧福特致敬? 】

琴晚英超嘅馬西塞特郡打吡,相信有唔少人嘅重點都放喺幸運童子奧歷治落場後帶畀利物浦嘅轉變。不過對守門員嚟講,重點一定係臨完場前艾利臣一下疑似向對方門將碧福特一個「致敬」嘅動作。


臨完場前利物浦已經領先到 2:0,愛華頓嘅啲列查利臣有一個射門機會,艾利臣輕鬆接實一兩秒後,突然跪低向前趴喺地下。相信各位球迷特別係利迷睇見都應該笑咗,因為上半場碧福特都有做過幾次類似嘅動作拖延時間。不過其實呢個動作最正路就分為「技術上需要」同「戰術上需要」,守開龍嘅朋友應該都明白,不過等我嘗試向唔太熟悉嘅朋友講解一下。

通常接完波然後向前趴,特別係接一啲貼地而且球速快嘅波,其實係一個「技術上需要」嘅動作嚟嘅。因為當個波貼地而且追身嘅時候,守門員會盡量傾前並烏低個身,雙手嘅前臂會放喺胸前形成一條火車軌咁樣嘅姿勢,用雙手手掌截停個波再抱上心口又好,由得個波經手掌碌上前臂再到心口然後抱實都好,呢個烏前嘅動作令到個波進入心口後嘅空間減少,變相更加容易接實之外,加埋心口盡量向地下嘅動作,就算之後個波反彈都只會彈返去近啲嘅位置,而唔會彈得太遠被對手執雞,呢個動作統稱為抱波或者 Scooping。

而之後趴低係一個因為身體烏低抱波後嘅 Follow Through 動作,順住勢跌埋落地之餘,亦都借埋草地呢個平面幫手「撳」實個波,減少畀對手撞甩或者自己甩手嘅機會,所以喺技術層面上,接一啲貼地而且球速快嘅波嘅時候做呢個趴前嘅動作係好合理嘅。

可以比大家睇下艾利臣練波嘅時候點樣做呢個 Scooping 以及趴埋落地嘅動作(1:28開始):
https://youtu.be/v36snA3Dsg8

不過上半場碧福特嗰幾下呢,係差唔多企定定接實後跪低然後再趴前,加上今場愛華頓嘅踢法,呢個動作好大機會都係「戰術上需要」。即係咩呀?好聽啲就係等球隊被攻門後爭取時間畀隊友冷靜返慢慢重新組織,難聽啲就係「揼波鐘」囉 😂

因為當一位守門員已經接實曬個波,仲要個波一啲都唔貼地,無啦啦要跪低再趴前,其實係對要快速反擊嘅球隊極不利。所以如果球隊輸緊,有時候門將接完個地波如果有需要趴低都會好快起身,又或者有得唔趴就唔趴,快啲起身反擊。所以做得呢個動作,多數都係見被人攻咗好耐,為咗比啲時間隊友抖抖氣,又或者臨完場前浪費下時間而做,對於接唔接實個波嘅影響不大。

其實碧福特因應戰術需要咁做想幫手守住利物浦拎一分為目標,都算係合理嘅,只不過上半場已經不斷咁做,加上臨尾艾利臣又做一次,難免唔令人覺得艾利臣係想向碧福特「致敬」嘅 🤭 (差啲講漏咗重點,就係艾利臣全程做呢個動作真係笑都無笑,得啲球迷笑,令到個畫面更加幽默 😂)

如果喜歡我們的文章,請即分享到︰

標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→