之前2月初嘅時候我已經提過白禮頓門將羅拔山齊士嘅表現其實非常標青，難怪領隊樸達咁決斷放棄馬菲賴恩，一下子就提升羅拔山齊士做球會正選，當時我仲話如果羅拔山齊士可以維持到呢個狀態，隨時有機會入選埋西班牙國家隊。誰不知都唔夠兩個月，山齊士就連同曼聯嘅迪基亞以及畢爾包嘅烏尼西蒙一齊入選西班牙國家隊，取代咗車路士艾利沙巴拿加嘅位置。見到佢嘅努力同表現獲得欣賞同回報實在非常開心，而呢幾個月羅拔山齊士嘅表現確係令白禮頓嘅防守增強咗不少。
睇返2月中 The Athletic 同羅拔山齊士做嘅訪問就知道點解佢明明得23歲，但點解睇落咁冷靜，表現得咁好。而當中佢亦都講到佢同佢偶像卡斯拿斯曾經有過嘅小交流，點解佢唔怕犯錯，有時候佢寧願簡簡單單一腳解圍仲安全同埋作客利物浦差啲比費明奴呃到嘅事。
The Athletic 報導 （節錄）：
羅拔山齊士表示：「我細細個嘅時候成日都好淆底。我知道自己應該要冷靜啲，因為當我真係可以冷靜落黎嘅時候，我任何方面嘅表現都有所提升。所以依家冷靜已經成為咗我性格嘅一部分。」
山齊士指佢嘅偶像係卡斯拿斯，而卡斯拿斯都有留意到山齊士嘅表現，令佢受寵若驚。
「雖然我嘅踢法唔似卡斯拿斯，但佢一直以黎我都係我嘅偶像。我之前做另一個訪問嗰陣，訪問我嘅主持係卡斯拿斯嘅朋友，佢就即刻幫我聯絡卡斯拿斯。卡斯拿斯喺短訊入面話有留意我嘅表現好好，我就話多謝佢做嘅一切，令我一路都有呢個可以做到新卡斯拿斯嘅夢想。然後卡斯拿斯就多謝返我當佢係偶像，佢非常高興，希望有一日可以見面。」
「我好感謝我嘅守門員教練 Ben Roberts，因為佢幫我揀咗最適合我外借嘅球會，包括格林森林流浪同埋羅奇代爾，兩隊都係好肯由後場開始組織嘅球隊。令到我對於要用多啲短傳更加有信心。當我外借效力呢兩隊波嘅時候，始終同踢英超好唔同，就算犯錯都仲有時間同空間比我恢復狀態，如果踢緊英超我根本無時間反省就已經要面對下一個狀況，咁只會令我再次犯錯。」
「今季我第一次上陣嘅時候係一場作客熱刺嘅比賽，當時有一個醫院波回傳比我，大約距離我20碼倒嘅一個彈地波。呢下我其實大可以將個波挑過熱刺球員再交比隊友，但最後我決定一腳踢出橫邊就算。雖然未必精彩但起碼簡簡單單先，有時唔好將啲事簡單複雜化，如果比對方偷到個波嘅話咁就要失波架喇。
「然後去到作客對住利物浦嘅時候，費明奴有一下接應米拿嘅直線傳送形成單刀攻勢，我即刻出迎應對。而當時我睇到費明奴個勢根本唔似會射波，似係想博我撲跌佢拎12碼，所以我淨係出迎封窄角度而並無成份飛落去。最後費明奴如我所料只係想輕輕控一控個波博我犯規，比著係以前嘅我就真係會撲落去，但經過外借至格連森林流浪嘅時候我都經歷過兩次差唔多嘅情況而輸12碼之後，我今次就醒喇，而費明奴亦都真係只能控埋出界。」
呢個攻勢完結之後，山齊士對住費明奴嘅一下單眼同微笑，就好似同緊費明奴講緊『你估我唔知你想點咩衰鬼？』一樣。
Robert Sanchez: More saves, longer passes and always safety-first
請按此登錄後留言。未成為會員? 立即註冊