窒步射12碼?當拿隆馬冷靜應對再加步法擾敵

【 日常賽後評 - 歐國盃決賽 意大利 對 英格蘭 - 當拿隆馬 】


歐國盃終極一戰,法定時間意大利同英格蘭打成 1:1 需要互射12碼分勝負。
意大利上一輪已經係憑互射12碼擊敗西班牙,當時當拿隆馬表現已經非常突出,而今場佢又再次成功救出兩球12碼,協助意大利以3:2擊敗英格蘭奪得冠軍。

不過今次想講嘅並唔係佢救出嘅兩球,反而係華舒福射失嘅一球。當時為第三輪,意大利因為碧福特救出比洛堤嘅12碼而只係入咗2球,相反英格蘭頭兩輪射入曬,加時入替軒達臣嘅華舒福準備操刀。

華舒福本身起動位置企得好直,然後首先打橫向左移再斜跑向個波,然後佢喺離個波仲有3/4碼倒做出一下窒步,不過當拿隆馬完全無畀比佢呃到,反而只係踏一踏前隻左腳搔擾返華舒福。

華舒福之後繼續助跑,臨射門一刻又再窒一窒步,但當拿隆馬仍然無被華舒福呃到跌低,反而今次用右腳向前踏一步。

有守開龍嘅朋友都知,守12碼由於大概都估到對手幾時會射,所以第一步多數就已經係 Power Step 踏出去飛撲,我相信當拿隆馬呢下喺華舒福臨射門踏前嘅動作,唔多唔少都有影響到華舒福嘅判斷,令華舒福以為當拿隆馬會撲向自己嘅左邊,但可能已經太遲,唯有盡量拎角度拎得盡啲,雖然當拿隆馬最後都撲咗另一邊,但華舒福最後拎得太盡就變成射中柱彈出。

睇返當拿隆馬撲出另外兩球嘅時候,其實佢並無呢兩下踏前擾敵動作,相信當拿隆馬同教練們一早已經做好曬功課知道要點對付華舒福。


當然呢一切都係我個人嘅推測,實際係點都係佢地自己先知,但其實當拿隆馬要喺咁重要嘅關頭仲可以咁冷靜地踏出呢兩下假腳其實都唔簡單。因為有機會會弄巧反拙,為咗踏出假腳令自己失衡從而變相撲得無咁遠或者跣腳都唔奇。

22歲仔已經有咁冷靜咁穩打穩紮嘅表現,仲拎埋今屆賽事官方嘅最佳球員,確係前途無可限量 💪🏻 恭喜意大利同當拿隆馬!

請多多支持守門員日常!
Thank you for your support on Goalie Daily!
Facebook: https://www.facebook.com/goaliedailyhk/
Instagram: https://instagram.com/goalie.daily
YouTube: https://www.youtube.com/channel/UCOkceg4wD4GdWiwsTRJ3EGw

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→