碧福特 : 運動心理學家幫我重拾狀態


愛華頓季初表現非常之好,但相反門將碧福特嘅表現就飽受批評。而隨住球季一路發展,愛華頓表現雖然無季初咁強,但調返轉碧福特就穩定地回復狀態。Echo 就節錄咗碧福特同愛華頓官網做嘅一段訪問,當中提及到原來碧福特早前開始尋求運動心理醫生嘅幫助令佢表現有所改善。

---------------------------------------------

碧福特訪問內容 (節錄):

碧福特:「我同呢位心理醫生無所不談,由心理質素去到如何喺唔同層面上進步都有傾過。」

「佢令到我思考得更多更好,同埋學習點樣應付唔同嘅情況以及承受壓力。」

「我想做自己心目中最好嘅一位門將。因為如果我狀態好嘅話係絕對會令到球隊有好大嘅機會贏波之餘仲可以令到各位愛華頓球迷感到歡喜。」

「我同呢位心理醫生多數一個星期會傾一次計,有時就兩個星期一次。每當我有需要嘅時候佢隨時都肯同我用電話傾計,或者如果真係有需要更加會約出黎見面。」
「我嘅一位朋友都有尋求佢嘅幫助,所以我一早就知佢喺呢方面嘅能力絕對幫到我,而且我都認為如果我要進步我就有需要尋求佢嘅協助。」

碧福特嘅表現事實隨住球季發展一路都有進步,證明安察洛堤並無浪費到對佢嘅信任。而愛華頓依家嘅排名都證明佢地將會一路努力爭取下季有歐洲賽事嘅參賽資格。而碧福特都認為自己嘅狀態唔錯而且想繼續進步。

「我覺得自己嘅狀態好好。」

「我認為呢個狀態已經維持咗一段時間。不過我唔會就咁停低,我唔想原地踏步太耐。我需要推動自己成為一位更加好嘅門將,對自己要求再高啲。」

「我想變得更強同埋有更加穩定嘅演出。而其中一樣對我黎講好緊要嘅就係一路成為英格蘭嘅一號門將。」

「好多人都非常留意同鐘意比意見歷代咁多年嘅英軍一號。而我就需要好好學習點樣應付呢啲壓力以及同佢地共存。」

「雖然會經常受到唔少嘅壓力,但我唯一可以做嘅就係每次比賽都盡力做好啲。」
「大家都只係人一個,有時狀態雖然係差咗但足球員就係會咁。無可能場場比賽都表現得咁完美。當去到一啲好難捱嘅事候,我地只可以以關關難過關關過嘅心態重新出發。」

「我一路進步緊而且仲有好多野要學。我好鐘意呢個過程,因為我唔想咁易就滿足而停滯不前,我需要一路推動自己。」

呢位愛華頓門將表現佢近呢幾個月有從其他運動員身上得到唔少啟發。特別喺西班牙網球手拿度,碧福特認為拿度經常能夠示範點樣喺比賽當中一路令自己冷靜落黎,好好地表現自己。

「雖然平時要努力訓練提升自己嘅能力,但落到場都要夠冷靜先可以好好咁發擇。我依家學習緊一啲技巧點樣可以令到我落到場嘅時候更加冷靜,而我覺得呢排我喺做決定上比起以前係真係有冷靜咗少少嘅。」

「雖然我仍然會對隊友有唔少要求,但依家我會用另一套方法向佢地發出指示,從而幫助球隊表現得最好。因為守門員呢個位置真係一眼睇曬所有野,所以我一定要靠不斷嘅提場去幫手。」

「所以我喺呢方面仍然有好高要求,但我覺得我對於做決定上係冷靜咗。」

「我平時真係咩運動都會睇,因為所有喺生涯最高峰嘅球員都會表現到一份冷靜感出黎。」

「哥爾夫球手絕對係一個最佳例子,雖然都有啲係衝動派不過最好嗰幾位球員全部都好冷靜。就算佢地打得唔好,你都知佢地好快就可以回復得返。」

「另一個好例子就係拿度。我由細睇到佢大。可以睇得出佢每次發球都唔會心急,慢慢黎令到佢個人更加冷靜。所以就算唔係睇足球,都絕對可以學到唔少足球場上運用得返嘅野。」

「當中就要靠點樣訓練個腦同埋有能力更進一步。」

---------------------------------------------

雖然碧福特事實表現確係唔多穩定,特別有唔少嘅失波都係因為佢嘅大意而唔係能力不足而引致,但作為一位守門員我都樂見佢知道自己唔夠冷靜而且唔怕去尋求幫助令自己更進一步。而且我都好欣賞佢唔甘於現狀嘅態度,一路逼自己唔好停落黎一路要進步。希望佢真係可以慢慢令自己可以做到愈黎愈冷靜,唔好再單刀亂咁衝起飛腳踢傷人喇...

愛華頓官網訪問原文

Echo 節錄原文

如果喜歡我們的文章,請即分享到︰

標籤: 英超  愛華頓  碧福特  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→