甸軒達臣歐聯首戰太緊張?單刀應對一味識衝


前晚嘅一場巴沙克舒希對住曼聯嘅歐聯賽事相信又令好多人跌眼鏡,明明曼聯之前先贏完巴黎又贏萊比錫,今場竟然輸比土超嘅巴沙克舒希?

相信大家都會認同兩個失波都9成9係後衛犯錯而引致,但失波當中其實如果再細心睇多幾次,我認為係可以發現到甸軒達臣喺呢兩球單刀應對上係有進步嘅空間。所以我喺 Facebook 同 Intagram 嘅 Story 到問咗大家嘅意見,撇除後衛犯錯呢個因素,大家覺得呢兩球軒達臣係唔係可以做好啲,定係覺得連迪基亞都唔會救得到。

好多謝兩個平台超過100位朋友嘅投票,最後嘅比數係 33% (軒達臣可以做好啲) 對 67% (迪基亞都救唔到),所以我今個 Post 嘅目的就係希望可以說服到呢 67% 嘅朋友,只要夠冷靜做足功課,單刀並唔係一定無得救。

不過亦都要再次利申一下
呢個 Post 唔係要怪責甸軒達臣!
呢個 Post 唔係要怪責甸軒達臣!
呢個 Post 唔係要怪責甸軒達臣!

只係想集中探討撇除後衛犯錯後甸軒達臣嘅單刀應對技巧,因為我認為佢如果可以再冷靜啲同決斷啲係絕對有能力救到呢兩球波。

不過未講呢兩球波之前,想先輕輕提一提門將單刀封位嘅五個技巧
1. 出迎再憑反應作出撲救
2. 出迎再用手去嘗試擒波
3. 出迎加大字型封位 (Spread Save)
4. 出迎加 K 腳封位 (Block Save)
5. 企較接近底線位置再憑反應作出撲救

技巧 1 同 2 都算係比較舊式嘅技巧,多數老一輩嘅門將同教練都會用呢兩招,不過同時都已經有事例同數據支持技巧 1 係任何情況下都係最差嘅選擇,而技巧 2 亦都只適用於窄角度嘅地波應對 。而技巧 3 至 5 就係近代將五人足球 Futsal 入面門將使用嘅技巧搬到上11人足球嘅舞台上,亦都因為應用上同數據上嘅支持令到愈黎愈多門將採用。

例如技巧 3 比較適用於14碼內嘅正中方向嘅單刀,技巧 4 就適用於14碼內嘅偏左或右方向嘅單刀。而如果球單刀離門14碼以外,最佳嘅應對係技巧 5。呢幾個技巧上嘅分野對於甸軒達臣呢場呢單刀應對有好大嘅影響,實際技巧分析第日有機會再同大家解釋。

先講返場波嘅第一球,成個 Facebook Twitter 都係 Cap 圖,我諗丹巴巴亞拎到個波之前發生嘅事都唔使我點講架喇。當丹巴巴亞接應長傳後,畫面開始見到甸軒達臣嘅一刻,甸軒達臣係向後移緊步。呢一個決定其實做得好好,因為丹巴巴亞距離龍門仲有一段距離,甸軒達臣向後移步可以令丹巴巴亞唔可以咁容易以笠射射破自己。

只不過當丹巴巴亞再推前,差唔多去到禁區頂嘅時候,甸軒達臣突然決定衝前,似乎係想封窄丹巴巴亞嘅射門角度。但首先當刻其實馬迪已經回防比緊肢體上嘅壓力落去丹巴巴亞身上,加上剛才提過14碼以外嘅單刀其實門將係唔需要急住出迎,反而甸軒達臣係應該留係本身嘅位置等丹巴巴亞再推入黎先再作出反應。而當甸軒達臣決定要出迎,但其實佢同個波仲有一段距離,逼使焗住佢要用先前提及嘅技巧1,出迎但再憑反應撲救。甸軒達臣呢一個出迎動作首先唔會封窄到啲咩角度,因為佢同個波仲有好大段距離,而且仲會令到佢因為同個波嘅距離短咗而大大減少自己可以反應嘅時間,所以最後丹巴巴亞射一球喺甸軒達臣左手手旁嘅波,甸軒達臣都比唔切反應去救。

之後就講第二球,左路傳中,中間嘅丹巴巴亞漏比右路完全空曬嘅維斯卡。甸軒達臣當時即刻向左移想對返正個波,其實都係絕對正確嘅決定同做法。不過佢一見到維斯卡個勢已經係準備拉弓,佢又忍唔住企出幾步想封位。但同頭先嗰球一樣,其實個波距離龍門都仲有一段距離,加上維斯卡呢球佢並無控定,而佢個勢亦都似會選擇第一時間撞射,甸軒達臣呢一刻其實應該停止右移同出迎嘅動作做好 Set Position 去迎接呢個射門。

可惜呢下甸軒達臣唔夠冷靜,令到甸軒達臣向左嘅衝力停唔切之餘亦都大大減少咗佢可以反應嘅時間。即使維斯卡射出一個偏龍門正中間嘅射門,但由於甸軒達臣個身一來飛緊去左邊,二來亦都唔夠時間比佢做反應之下,又再次被對手射破十指關。

不過都想講返,我亦都唔係想講做咗好似最適用嘅技巧甸軒達臣就一定救到呢兩個射門,因為單刀本身門將就係輸蝕,門將單刀應對嘅目的從來都只係提升對方前鋒射入自己嘅難度。但因為甸軒達臣本身採用嘅技巧以及佢當刻唔夠冷靜大大減低咗自己撲救嘅成功率同埋對方射入嘅難度。

正如之前我都有提過,我一定唔會話甸軒達臣呢兩球做得未算最好就話佢唔識救單刀,相信佢可能係第一次踢歐聯可能有少少怯場,加上一黎就要迎接兩個對方前鋒都有咁多空間發揮嘅單刀,會忍唔住想衝出去封位都算係情有可原,要做到絕對冷靜真係唔係咁易.....

如果喜歡我們的文章,請即分享到︰

標籤: 歐聯  曼聯  甸軒達臣  單刀  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→