甸恩軒達臣 vs 迪基亞 | 一山不能藏二虎 推薦

自從三月初迪基亞因為要返西班牙陪住太太分娩之後，甸恩軒達臣就食住個勢一路成為曼聯嘅正選門將。就算迪基亞歸隊之後，蘇斯克查都偏向使用甸恩軒達臣作為曼聯喺英超賽事入面嘅正選，而迪基亞只能出陣歐霸盃嘅賽事。甸恩軒達臣今季久唔久都會幫曼聯上陣，不過表現可以話係好壞參半，間唔中都會有啲唔太穩陣嘅感覺，例如高波唔太敢出迎、單刀企位唔上唔落、想由後場組織但唔小心畀對手偷波射入等等都有發生。所以難免有支持迪基亞嘅朋友覺得迪基亞應該要做返正選，認為甸恩軒達臣仲要浸多一排。
不過經過近期嘅聯賽，特別係前日作客熱刺嘅賽事之後，實在睇得出甸恩軒達臣嘅進步絕對不容忽視。無論出迎接傳中波、窄角度射門用腳擋出、定係要擔任清道夫角色出黎解圍都非常清脆之餘亦睇得出佢做決定非常果斷，完全無猶疑。

咁其實究竟甸恩軒達臣同迪基亞喺做清道夫同埋傳中波出迎嘅數據上又有幾大分別呢？

可以先睇下以下由門將分析師 John Harrison 嘅圖表：

甸軒達臣 - 20/21 英超球季清道夫數據及位置

迪基亞 - 20/21 英超球季清道夫數據及位置

可以睇到甸恩軒達臣今季為曼聯做咗11次「清道夫」，避免咗對手11次嘅進攻機會，睇返每球嘅威脅除返開每場以90分鐘計避免咗 0.15 ExG (Expected Goal)。而迪基亞今季為曼聯做咗14次「清道夫」，睇返每球嘅威脅除返開每場以90分鐘計避免咗 0.07 ExG。（今季英超門將呢項嘅平均數係 0.10 ExG）
由於甸恩軒達臣上陣次數比較少，所以對比返迪基亞，其實甸恩軒達臣出黎清波嘅次數比迪基亞更加頻密之餘亦都夠膽走去一個離門較遠嘅位置清波，令甸恩軒達臣每場比迪基亞避免多 0.08 嘅 ExG (大約等於每12場失少1球）。不過迪基亞比較甸恩軒達臣處理得好嘅就係出黎清波之後嘅控球權多數都會落返喺自己隊友到，而甸恩軒達臣就多數一腳踢走唔太理個落點，安全為上。

睇完「清道夫」數據之後就睇埋傳中波嘅應對：

甸恩軒達臣 - 20/21 英超球季傳中波應對數據及位置

迪基亞 - 20/21 英超球季傳中波應對數據及位置

傳中波方面，甸軒達臣今次曾經出迎12次，睇返每球嘅威脅計返每90分鐘就避免咗 0.29 嘅 ExG。而迪基亞就曾經出迎18次，睇返每球嘅威脅計返每90分鐘就避免咗 0.15 嘅 ExG。（今季英超門將呢項嘅平均數係 0.20 ExG）
再次由於甸恩軒達臣上陣次數比較少，所以其實可以推斷甸恩軒達臣出迎嘅次數同樣地比迪基亞頻密而且夠膽走去一個離門較遠嘅位置處理傳中波，所以甸恩軒達臣比起迪基亞喺傳中波應對方面每90分鐘避免多 0.14 嘅 ExG （大約等於每7場失少1球）。不過喺處理質素方面，迪基亞又確係比甸恩軒達臣好少少，迪基亞接實個波嘅次數比起甸恩軒達臣多少少，不過好大原因係因為迪基亞多數見到一啲比較容易處理嘅波先會出迎。


睇完兩項數據比較之後，可以睇到甸恩軒達臣喺呢兩方面唔單止比起迪基亞稍勝一籌，而且比起今季平均英超門將亦都好。雖然佢未至於係最強嘅一個（利物浦嘅艾利臣同曼城嘅艾達臣每場「清波」大概幫助球隊每場避免 0.18 ExG，而般尼嘅樸比同阿士東維拉嘅馬天尼斯喺傳中波應對上大概幫助球隊每場避免 0.36 ExG），但甸恩軒達臣絕對已經緊隨其後。相反迪基亞呢兩方面嘅數據都比今季平均英超門將嘅表現為弱，不過亦未算係最差。
甸恩軒達臣敢於出迎而且夠敢去一個離門夠遠嘅位置幫助球隊，對曼聯黎講絕對係一個非常重要嘅因素去繼續使用甸恩軒達臣做正選門將。因為咁樣就代表曼聯可以繼續打高位防守同埋專注防守一個相對地細嘅範圍。有咩事個波一過頭甸恩軒達臣就會隨時準備好出迎應對。

大家又覺得甸恩軒達臣準備好接迪基亞班，做曼聯嘅正選門將未呢？