用腳救波係死罪？迪基亞習慣大拆解 精選 推薦

似乎大家對之前關於碧福特普比同英格蘭教練熱烈討論追身波應該點救嘅 Post 都有好唔同嘅意見同見解。亦都有朋友方別舉出用手同用腳救嘅好處同壞處，不過有一點想特別拎出黎同大家講解下嘅，就係迪基亞經常用腳擋波嘅習慣。
今次主要係想翻譯同分析返 Sky Sports 記者 Adam Bate 2019年年初對於迪基亞喺作客對熱刺嘅賽事嘅表現而寫嘅一篇報導。呢場比賽迪基亞總共作出11次撲救，當中4次係用腳擋出，而呢個亦都係英超近10年內以腳擋出射門最多次數嘅紀錄，最後曼聯亦都成功憑住華舒福一個入球以 1:0 擊敗熱刺。迪基亞賽後仲真係聽咗著名 Sky Sports 足球評術員 Martin Tyler 嘅建議，將佢喺呢場波著嘅嗰對波 boot 裱起咗。

Sky Sports 報導（節錄）
『Richard Lee (前屈福特，布力般及富咸門將) 對迪基亞用腳擋波嘅方法有以下嘅見解：「用腳就一定唔係最正宗嘅方法。平時練波根本完全唔會有特別一堂係叫我地去練習用腳擋波。呢一招雖然唔正宗，不過如果救地波又真係比起傳統用手會更加快。而迪基亞喺需要於一個極短時間之內要決定由用手轉做用腳呢方面已經成為咗一位專家。」
如果用腳係「唔正宗」，咁究竟迪基亞呢一招係邊到黎？其實就係因為佢自細已經開始踢5人足球 Futsal ，而 Futsal 龍門經常要用到嘅 Split Save 同 Block Save (即係香港俗稱嘅星形救波同 K 腳)，就係正正迪基亞經常用到嘅技巧。

英格蘭 Futsal 國家隊龍門教練 Tony Elliott 上年睇完呢場波之後就話：「嗰啲淨係識話熱刺埋門質素差，所以迪基亞先救到嘅嗰班人簡直係垃圾。有幾球如果喺其他門將用所謂正宗嘅方法嘗試撲救，九成九輸咗啦。迪基亞並無一尾死跟正宗方式，而係根據當時形勢而實行相對嘅解決辦法，我覺得咁樣先係要成為一個好門將嘅精髓。」

Elliott 同時表示，講起用 Futsal 嘅門將技巧黎踢英超，就令佢諗起前利物浦門將連拿 Pepe Reina。連拿當時經常於單刀嘅情況下使出 Split Save 技巧，一邊落地一邊將四肢完全打開去封窄對方嘅射門技巧。而連拿除咗同迪基亞一樣係西班牙人之外，佢亦曾經效力過巴塞隆拿。而效力巴塞嘅球員差唔多個個都會踢埋 Futsal，加上西班牙人本身對 Futsal 嘅熱愛，令佢地一向盛產 Futsal 高手，種種原因都不斷地影響緊呢個國籍嘅門將發展。
Elliott 指雖然迪基亞已經再無接受 Futsal 嘅訓練，但佢仍然將佢喺 Futsal 學到嘅技巧引入11人場內。而曼城嘅門將艾達臣都曾經公開講過佢都有將佢細細個喺巴西踢 Futsal 得到嘅經驗一路應用到依家。
Elliott 慨嘆英格蘭籍嘅門將唔會好似艾達臣咁，能夠將 Futsal 嘅技巧帶去11足球場上，因為英格蘭嘅教練根本唔會咁教之餘，當地亦都唔重視 Futsal，令到本土龍門無辦法融合兩者嘅好處加以改進。

「英格蘭係唯一一個國家啲球員由細到大都唔會接觸 Futsal，咁所以咪教極都係同一套，然後當佢地喺球場上遇到一啲前所未見嘅狀況，就會變得不知所措。我經常用哥爾夫球棍作為例子去教我班球員，如果你得一款棍，你好難成個回合都打得好，始終你總會遇到一啲情況係你支棍唔多啱使。如果你手揸多幾款棍，咁你就易打好多，用返落門將身上，佢地都應該要同時識用腳同手去救波。
英格蘭門將嘅傳統就係要接實個波。但你睇下迪基亞對熱刺呢場波，有幾多次佢係真係可以接實個波？可能有兩次啦，其餘撲救佢一係用手拍走個波，一係用腳踢走或者擋走個波。但咁係咪代表佢就唔係一個好門將？
我並唔係想質疑嗰班仍然唔會教球員用腳救波嘅教練，但我會想同佢地講足球一路進化緊。成個玩法唔同曬，而現今足球嘅速度令到門將做決定嘅考慮時間愈黎愈短。講到尾，就係足球嘅改變令到門將都分曬門派。並唔係有門將無啦啦為變而變，而係現今足球促成門將嘅進化，呢一切就係因為門將要為咗足球嘅改變而作出調整。

有門將同我講，11人個龍門大過 Futsal 嘅咁多邊有得比呀。我就只會話，其實兩方嘅分別就真係只有個龍門嘅大細。你睇下迪基亞對熱刺做出嘅撲救，有幾多球係離佢身體多過兩米？當中只有兩球佢係需要伸到最盡，但其餘大部分嘅撲救都係離佢身體大慨一至兩米，而一個 Futsal 龍門有幾大？咪又係差唔多呢個闊度。所以技巧係絕對可以互相轉移，而迪基亞就係用緊佢以前踢 Futsal 對龍門嘅距離同空間感去做出撲救，佢都唔會為一啲根本無可能救到嘅波而飛撲。」
Richard Lee 認為 Split Save 同 Block Save 已經愈黎愈多人採用，本土教練應該開始慢慢接受呢個改變。「迪基亞喺呢方面已經領先其他人幾條街，呢種技巧好快就會變成一個新標準。你睇下依家啲門將幾興用車身鍋利開生球？我細個𠴱陣啲人見你用呢招只會覺得你點解要咁花巧，但係依家就算你見到一個9歲嘅小朋友可以好似艾達臣咁用車身鍋利開一個靚嘅生球真係一啲都唔出奇。等於 Futsal 嘅技巧，就算依家班教練唔會教，但始終有一日佢地需要行到呢一步，因為啲門將學識呢招係隨時可以幫到佢地喺一場比賽入面救多四至五球，即係隨時可以同時幫助球隊喺聯賽榜拎多四至五分。我地唯一需要嘅就係要有多啲教練識得點樣教班踢開11人足球嘅門將去用 Futsal 嘅技巧。」

Elliott 覺得有好多守門員教練對於技術上嘅改變有一份恐懼，因為佢地只會諗呢啲新招對於舊式足球係唔可行，而唔會諗其實現今嘅足球已經唔同曬，所以佢地就寧願教返一啲佢地覺得一路以黎都係正宗嘅技巧。不過佢相信遲早所有教練都一定會接受呢件事，因為已經有好多教練問緊 Elliott 應該點樣為門將進行相關嘅訓練，同埋已經愈黎愈多小朋友踢 Futsal。小朋友最鐘意就係模仿佢地嘅偶像，當佢地見到迪基亞用腳擋波嘅效果係咁好，佢地根本唔會理呢招究竟正唔正宗。

講到尾，其實係咪應該要改變所謂正宗守門員嘅定義呢？』

本身睇呢篇文只係諗分享當中嘅幾句就算，不過譯下譯下發覺當中有唔少金句同重點，所以最後都差唔多譯曬成篇。而版主都非常認同呢位記者同兩位受訪者嘅睇法，新野未必一定好但舊野都未必一定啱。足球同科技一樣，無論踢法同規列都一樣日新月異，如果仍然抱住守舊嘅思想一成不變，好快就會跟唔上其他肯求變求進步嘅人。

而之前提到嘅英格蘭門將同教練討論應唔應該用腳，相信唔使我講大家都知邊位就係呢篇文入面 Tony Elliott 提到嘅唔肯改變嘅人。希望英格蘭嘅教練會慢慢發現同醒覺，唔好再覺得一個方法可以用到老，就算個方法上季仲係正確，隨時今季已經過曬時了。
多謝你睇到呢度都未走人，如果大家對呢啲咁長嘅技術分析同翻譯文有興趣嘅話，歡迎你留言話比我地知同埋 Like 呢個 Post 去支持我地繼續分享更多同守門員有關嘅資訊 👍🏻

https://youtu.be/BHzli_EpVOc