用數據話你知:點解西班牙棄用迪基亞

【 迪基亞名落孫山的原因 】

有唔少球迷對於安歷基喺最新一次西班牙國家隊陣容放棄迪基亞嘅決定感到非常不滿,認為迪基亞今季喺曼聯嘅表現無可能無份入選,唔明點解會揀賓福特嘅拉也取代佢嘅位置。但其實我個人認為安歷基呢個決定絕對係有跡可尋,相信佢都等咗呢個機會好耐,去到呢一刻終於實行咁解。

有一件事無庸置疑嘅,就係今季迪基亞嘅撲救能力確係非常好。根據 fbref.com 嘅數據顯示,迪基亞今季喺英超幫曼聯足足失少咗 10.6 預期入球,比起第一位嘅祖斯沙只係少 0.1 球。而入選國家隊嘅施蒙、山齊士以及拉也就分別幫球隊喺聯賽失少 1、0.7 以及 1.3 球,雖然三位球員嘅 PSxG +/- 都係正數,但亦都同迪基亞有一大段距離。

咁點解迪基亞撲波咁勁都可以無份入選?全因佢同安歷基嘅戰術完全唔夾。西班牙大家眾所周知,踢法同曼城、利物浦等等嘅球隊差唔多,都係打高位防線嘅踢法為主,變相對於守門員嘅傳球、傳中出迎、清道夫嘅能力要求相對較高。而迪基亞撲波幾勁都好,偏偏呢幾項能力佢都係比較弱,一齊睇一睇迪基亞同入選嘅三位門將喺呢幾個方面嘅比較。

傳球方面,40碼以上嘅長傳成功率,排名為:
施蒙43.7% 、拉也 41.4%、迪基亞 36.8%、山齊士 32.9%

傳中阻截成功率嘅排名為:
山齊士 12.7%、拉也 8%、施蒙 6.7、迪基亞 3%

然後就到平均每90分鐘於禁區外進行防守行為次數嘅排名:
拉也 1.33、山齊士 1.04、施蒙 0.71、迪基亞 0.21

睇完數據,再睇埋安歷基喺記者會交代揀選拉也嘅原因:「拉也近況非常好,我好想睇下佢可以點樣融入球隊,因為佢擁有曬球隊需要守門員必須兼備嘅能力,呢個係我地揀守門員嘅其中一個重要嘅原因。」

睇完以上嘅數據加埋安歷基嘅回答,相信大家都會開始明白點解安歷基會把心一橫放棄迪基亞並選拉也補上。始終迪基亞都係一位相對傳統嘅被動型門將,如果效力一啲防線較後,中堅應付高波能力較高以及唔需要守門員從後組織嘅球隊,只需集中做好撲救嘅話,佢嘅表現絕對唔會差。

只不過現今世代,愈嚟愈多球隊追求 play from the back,防線亦愈推愈前下,迪基亞嘅能力確係相對無咁合適。迪基亞無論喺單刀定係傳中波佢都實在較少主動出迎,球隊戰術關係佢亦較少需要走出禁區解圍,而無論長傳短傳方面佢都確係唔算標青,要幫助球隊從後組織實在對佢嚟講係相對地困難。

所以安歷基放棄迪基亞取拉也呢個決定,可以話係有啲出奇但又唔算十分意外,只能夠講依家對守門員嘅要求愈嚟愈高,需要擅長嘅範圍愈嚟愈廣,已經唔再停留喺淨係識得撲救咁簡單了。

如果喜歡我們的文章,請即分享到︰

標籤: 門將  守門員  龍門  

留言


請按此登錄後留言。未成為會員? 立即註冊
    快捷鍵:←
    快捷鍵:→