烏蘇荷 - 連迪基亞同C朗都讚不絕口 其實早前備受評擊

【 你有準備好迎接話嚟就嚟嘅機會嗎? 】

難得連續幾晚嘅歐洲賽事都有守門員有出色嘅表現,實在值得出多幾個 Post 講下嘅。今次想講嘅係效力緊塞浦路斯球隊奧摩尼亞 (Omonia Nicosia) 嘅門將烏蘇荷 (Francis Uzoho),因為佢喺對住自己愛隊曼聯嘅歐霸盃賽事當中實在光芒四射。

今場曼聯雖然最後以 1:0 擊敗奧摩尼亞,但其實入球都要去到下半場補時階段先出現,而烏蘇荷喺全場比賽入面足足做出 12 次撲救,有 9 次係禁區內嘅射門,其實差好少就可以保住張 Clean Sheet。喺網上見到有唔少人話只係曼聯嘅前鋒把握力唔好,射埋烏蘇荷身上,而唔係烏蘇荷好波,但其實如果明白嘅朋友,就會知道事前嘅準備功夫先係重點,唔係淨係睇最後射門角度咁簡單。
當中有好幾球嘅遠射,其實烏蘇荷嘅位置感都係非常之好。佢完全無被曼聯一眾起腳球員吸引到,特別係一啲前面人多密集嘅射門,佢仍然好冷靜地留喺門線兩三碼前,為自己爭取足夠嘅時間睇楚清個波嘅來勢再做撲救動作。所以只要企啱位,有足夠嘅時間做反應同飛撲,最後睇落咪會覺得射門無乜角度囉。

聽落就簡單,但相信大家都見唔少守門員成日無啦啦被對方吸引,愈行就愈出以為咁樣可以「封位」,但明明對手同個波距離龍門仲有一段距離,根本封唔到咩位,完全忽視咗同個波距離近咗就自然得返更少時間做反應呢個問題。(其中今週一個好好嘅例子就係格拉斯哥流浪嘅麥佳格,可以留意下沙拿入嘅第二球麥佳格嘅企位,令到一球明明可以輕鬆接實嘅波都變做入球)

而烏蘇荷就係遠射又企位準確之餘,連華舒福其中一球左路單刀佢都夠決斷出迎封位,預判準確知道自己可以喺華舒福起腳前收窄同個波嘅距離,從而成功以 Spread Save 大字型撲救擋出。另一球精彩撲救當然唔少得救完安東尼嘅射門之後,立即起身擋埋華舒福嘅補射,絕對係身體質素再加意志力嘅混合體。

吹奏咗咁耐,但其實唔講唔知,烏蘇荷根本就唔係奧摩尼亞嘅必然正選門將。而烏蘇荷喺今年三月對住加納嘅世界盃外圍賽,次回合當中因為佢畀效力阿仙奴嘅湯馬士射一個無乜角度但經手底漏入嘅波,間接令尼日利亞無緣今屆嘅世界盃,曾經備受評擊。

不過今場烏蘇荷嘅表現確係令人眼前一亮,睇得出佢非常集中,相信同佢本身好期待嚟曼聯主場踢波有關,賽後訪問佢講到:「其實我一啲都唔失望,因為我地踢咗場好波,但當然如果可以拎到一分走會更加好,但我已經好開心了。因為可以喺奧脫福比賽仲要對住呢班球星絕對唔係易事,所以整體嚟講我都幾開心。我係一個曼聯嘅死忠,所以對我嚟講係夢想成真一樣。我由細到大都成日發夢可以喺呢到踢波,所以當我見到抽籤結果嗰陣,我就知道我一定要有份落場,我好想參與。我係咁同神祈禱,最後我真係得到呢個機會,所以我真係好高興可以係到踢波。」

機會係留畀有準備嘅人,而今次烏蘇荷明顯地有好好把握呢個令世人認識嘅機會。相信佢如果可以努力保持返今場嘅水準,喺不久嘅將來應該可以搶返個正選甚至有能力打返入頂級聯賽。依家先 23 歲,大把世界啦!

烏蘇荷 對曼聯撲救精華 by BeinSports
https://www.youtube.com/watch?v=Umf7vLyU2ek
標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→