法甲無好野?文迪用表現說服大眾


昨晚有一場英超大戰,由車路士對住曼聯。雖然最後打成 0:0 平手,不過當中車路士門將文迪嘅表現確實令人眼前一亮,前日先講完話施治跟操狀態 Fit 到爆,唔通真係激發到文迪嘅表現再上層樓?
今次想分析下佢今場三個精彩撲救,分別係35分鐘華舒福嘅半單刀,40分鐘馬達嘅遠射以及90分鐘同樣來至華舒福嘅遠射。

35分鐘般奴費蘭迪斯一個直線放比華舒福,華舒福控球前一刻鏡頭先影到文迪嘅身影。見到當時文迪已經一路向後移動緊,大膽推斷佢原本差唔多企到禁區頂,但預判呢球直線將會恰到好處比華舒福控前,所以文迪一早已經決定唔會出迎。呢一個決定令到華舒福即使控得非常順腳亦無推甩腳,但因為文迪嘅企位令到華舒福既唔可以笠射又唔夠位扭過文迪,咁華舒福就得返射左右兩邊嘅選擇。由於文迪呢球真係封位封得好靚,襯華舒福拉弓之際已經停低做好 Set Position,加上佢手長腳長,就算未企到去華舒福面前都已經封曬兩邊嘅波。最後華舒福選擇射遠柱嘅地波,睇落好似無乜角度,但其實我覺得比起華舒福嘅處理,文迪封位技巧更值一提。

40分鐘,華舒福左路推進,入到禁區再傳比企係禁區頂嘅馬達,文迪因應個波由左路傳返去中路,已經向左移咗一步。不過文迪呢刻都醒目,即刻做多幾下好輕微嘅小跳步重整自己嘅重心,唔會太過偏向左邊。而馬達接應一下亦都立刻撞射射返近柱,雖然射門一刻蘇馬應該遮咗少少文迪嘅視線,但文迪嘅反應實在夠快之餘佢嘅準備動作做得好,全靠小跳步無令佢因為移向遠柱而翻唔切身去救呢球近柱波,又一球精彩撲救。

不過講到最精彩,一定係救出臨完場前華舒福嘅一球遠射。首先雲比沙卡右路斬入禁區,艾斯比列古達解圍出禁區頂,般奴費蘭迪斯一篤篤咗比企係禁區頂偏左嘅華舒福。而其實呢幾下波子機文迪已經要不停做小跳步加左右移步去對準返個波嘅位置同隨時準備迎接射門。而華舒福接應一刻選擇即時撞射,文迪嘅 Set Position 雖然同現今好多門將一樣企得好闊,不過佢 Set 好之後再次靠小跳步去重整重心向前,加上左腳嘅 Power Step,令佢飛得夠遠成功撲走呢球。


雖然比賽途中佢都有一球橫傳失誤,本身想傳比泰亞高施華,點知差啲傳埋入自己龍門,最後送咗角球比曼聯。但以佢呢三球撲救嘅表現,相信車路士球迷暫時都終於可以將門將一環係弱點呢件事放低一排喇。

如果喜歡我們的文章,請即分享到︰

標籤: 車路士  文迪  門將  龍門技巧  小跳步  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→