決賽一次足以致命:遠距離單刀再次收死艾達臣

【 日常賽後評 - 美洲國家盃決賽 巴西 對 阿根廷 - 艾達臣 】


今屆巴西喺美洲國家盃小組賽事對於門將嘅位置一路都用輪換戰術。艾利臣踢兩場,艾達臣同韋華頓各踢一場,不過當入到淘汰賽階段就一路都用上艾達臣做正選門將。

相信除咗因為佢嘅撲救表現之外,佢嘅傳送能力確實比起另外兩位更加上乘。有留意開艾達臣同我地專頁嘅朋友可能都知道艾達臣對於遠距離單刀嘅應對確係較弱,更加有網友喺 Twitter 出咗一條相關嘅精華 ( https://twitter.com/jamalilloo/status/1413873034184769536 ),而今次決賽之後,似乎條精華又要加多新一段入去了...

阿根延中場迪保羅一個非常之靚嘅長傳,一下劏開曬成條巴西後防,直接交咗比迪馬利亞。鏡頭影到艾達臣喺迪馬利亞控波之前似乎完全無諗過縮後,可能同巴西左閘盧迪差少少就掂到個波嘅關係,令艾達臣稍有猶豫唔敢咁快縮後,不過呢下猶豫就令佢陷入兩面不是人嘅情況。


迪馬利亞帶住個一路彈緊地嘅波步步進逼,艾達臣本身企得咁出,繼續出又驚會畀迪馬利亞扭過,但依家先縮後嘅話迪馬利亞又可以隨時起腳,最後變相只好企定定任迪馬利亞魚肉。

手揸主導權嘅迪馬利亞非常靈巧地一下逗高個波笠死艾達臣,阿根廷最後亦都係憑呢球以 1:0 擊敗巴西,繼1993年後再次奪得美洲國家盃冠軍。

相信同一年內兩場決賽都係以一球飲恨仲要都係輸單刀,艾達臣個心一定唔好受。不過艾達臣啊艾達臣,對住你真係恨鐵不成鋼呀,幾時先可以更加決斷呀...?

請多多支持守門員日常!
Thank you for your support on Goalie Daily!
Facebook: https://www.facebook.com/goaliedailyhk/
Instagram: https://instagram.com/goalie.daily
YouTube: https://www.youtube.com/channel/UCOkceg4wD4GdWiwsTRJ3EGw
標籤: 美洲國家盃  巴西  阿根廷  門將  守門員  單刀  

留言


請按此登錄後留言。未成為會員? 立即註冊
    快捷鍵:←
    快捷鍵:→