桑馬超強步法、神反應 完美補救身高弱點

【 神乎奇技 超人桑馬 】

桑馬雖然身高只有一米八三,但長期憑住佢對步法嘅熟練以及驚人嘅反應做出唔少非常之癲嘅撲救,而喺剛剛一週嘅德甲賽事入面,慕遜加柏可以話全憑佢幾下超人般嘅撲救先可以同緬恩斯以 1:1 握手言和拎返一分。

第一球來自緬恩斯嘅反擊,巴利路 (Leandro Barreiro) 長驅直進,而桑馬就一路退後到離門中心大概三碼位置。巴利路最後喺禁區頂施放遠射,最後中柱彈返出去禁區內中間位置。貝卡特 (Jonathan Burkardt) 睇住已經因為飛撲而跌咗落地嘅桑馬,諗住補射都入硬然而立即撞射。

點知桑馬成功起咗半個身遞高右手,將呢個同佢得返唔夠八碼又有速度嘅射門托高,最後個波越楣而過。救完呢球,幾位緬恩斯球員都抱住個頭,因為桑馬呢下反應真係快到難以置信...


之後第二球來自艾朗馬田 (Aarón Martín Caricol) 嘅一球左路傳中,桑馬轉身對準落點,接應傳中然後射門嘅又係貝卡特 。由於貝卡特射出一個彈地波,令桑馬本身做完小跳步雙腳落地後要再做多次調整重心,然後先以左腳落地,再以右腳發力 Power Step 起跳將個波撲高。

不過威脅仲未解除,因為個波仍然喺場區內離門大概四碼位置。緬恩斯球員李在城 (Lee Jae-sung) 跳頂將個波頂向龍門方向。桑馬又再成功極速起身並再做一次左腳落地右腳 Power Step 動作,將個波撲高中楣,跌返落面前,然後桑馬再向前接返,終於可以抖返啖氣。


桑馬呀桑馬,你啲回身速度,反應同彈跳力勁成咁,得唔得㗎?

桑馬 對 緬恩斯 - 撲救精華
https://www.youtube.com/watch?v=H7uvR0Z9Vu8

如果喜歡我們的文章,請即分享到︰

標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→