數據和你講 - 英格蘭正選與後備門將存在-11.5%實力差距


随住2020過去,代表20/21球季差唔多去到一半,今季唔少英超球隊於門將位置都有變動,某幾隊亦因為門將位置嘅變動對球隊於聯賽榜位置有顯著變化。

有關xSave呢項數據其實之前嘅post都有解釋過,總括黎講係因應射門起腳位置、角度、球速、離門距離等以統計方式得出射門被救出嘅概率。簡單講解下圖:x軸水平線係預期每場波門將應該要救到嘅射門次數概率總和,中位數為3.0,即反映英超門將每場波平均作出3次預期撲救。中線右邊嘅門將每場需作出多於中位數嘅預期撲救,反映球隊要面對較多射門,意指己隊後防喺保護龍門方面較為失色,所以亦解釋到右邊多數係下半版球隊,呢類球隊大多防守較鬆散,對方前鋒會有較多空間從而較多起腳;相反左邊球隊大多後衛對龍門有較佳保護,後防受壓相對較少,面對嘅總射門數自然較少。y軸垂直線則代表實際表現與預期表現嘅分野,中線0係表現同預期一樣,一路向上就係實際表現比預期數據出色,反之就係較預期差。

個別球員點評:

般尼嘅撲比今季撲救表現出色,係全英超數據最好嘅門將,實際表現比預期表現高8%,球隊現時為止只失20球,係下半版中失球第2少嘅球隊,只比阿仙奴失多一球;而貴為係英格蘭正選門將嘅碧福特於季初錯漏百出,實際表現比預期低3.5%,撲比和碧福特撲救表現嘅差距係驚人嘅11.5%,即每面對100次射門,碧福特將比撲比失多11.5球!眼看如此驚人嘅數字,碧福特仍然穩坐國家隊正選係難以置信。同樣都係英格蘭籍嘅仲有紐卡素嘅達奴同西布朗嘅莊士東,兩者於所屬球隊面對嘅攻門壓力比碧福特都要高,但實際比樣都比後者好6.5%!

熱刺嘅羅利斯繼續有好表現,實際表現比預期高6.5%,係Big 6門將中最高,亦係全英超排第2嘅門將。值得一提嘅係熱刺係唯一一隊後防受壓較多(即位於圖表右方)嘅前列球隊。Big 6入面利物浦、曼城及車路士都係後防受壓最少嘅三隊,其中以利物浦嘅艾利臣表現最好,實際表現比預期高約5%;而曼城嘅艾達臣實際表現只比預期高約2%,加盟初期表現被受吹捧嘅車路士門將文迪近期表現有所回落,實際表現則比預期低1%。
另一個焦點就係前阿仙奴門將、現在係維拉正選門將馬天尼斯,轉會後一直保持穩定演出,實際表現比預期高約5%,加上隊球防線防守表現都有所進步,現以8場不失球領先金手套獎。馬天尼斯絕對係今季維拉成績大躍進嘅功臣之一。另一邊箱,白禮頓嘅馬菲賴恩係今季表現最差嘅門將,實際表現比預期低達8%,如此差勁嘅表現亦令佢最近失去球隊正選位置。

門將好多時都係球場上最被忽略嘅位置,強隊嘅門將通常有星級中堅搶了他們的風頭;弱隊的門將則會因總失球數字較高而被看低佢嘅表現而誤解他們於球隊嘅重要性,但經常強調,一個好嘅龍門可以幫球隊由和變贏、輸變和,睇波時不妨多留意門將嘅動作細節、多欣賞門將於球場的付出吧!

如果喜歡我們的文章,請即分享到︰

標籤: 門將  英超  撲救  數據  英格蘭  

留言


請按此登錄後留言。未成為會員? 立即註冊
    快捷鍵:←
    快捷鍵:→