拯救拜仁當食菜 單刀應對紐亞瓣瓣掂 精選

歐聯夜又回來，而拜仁前晚就對住薩爾斯堡紅牛。就咁睇賽果拜仁贏 3:1 好似無乜特別咁，但原來當中紐亞作出足足10次撲救，唔通真係要不是紐亞的照顧拜仁就.....
相信大家都唔會否認紐亞其中一樣做得最標準嘅就係單刀應對，今場佢真係要使出渾身解數乜招都出曬先拆得掂，等我拎當中三球出黎同大家分析一下。

15" 比利沙
當時比賽踢成 0:0，紅牛球員比利沙於左路接應直線推到去小禁區左角，紐亞果斷決定出迎並以 K腳 (Engage with block save) 封窄比利沙射門角度，最後亦成功擋出射門，雖然擋出後亦被紅牛球員成功補射，不過力度同角度欠奉，紐亞回身接實。

35" 施堡斯拉
仍然維持喺 0:0 嘅時候，紅牛仲有另一次單刀機會。施堡斯拉當時接應傳送推到入禁區內大慨15碼位置，周圍兩三個身位內都無拜仁球員施加壓力，而且角度正中基本上左中右任揀。不過紐亞處變不驚，由於個波同底線仍有一段距離，所以佢決定留守小禁區頂令佢有更多反應時間 (Wait & React) 以提高施堡斯拉射入嘅難度。最後施堡斯拉唔知係咪太過緊張以及見到紐亞並無出迎，求其一腳射埋上太空。
69" 安維佩
然後就去到比賽中後段，紅牛左路攻勢。比利沙窄角度勁射，紐亞撲出小禁區外太慨10碼嘅位置，令當時企喺嗰到嘅安維佩可以嘗試補射，而今次紐亞就見到因為射門角度正中之餘亦都離門不足14碼，所以佢立刻起身出迎並攤開身體以大字型封窄射門角度 (Engage with Spread Save)，最後亦成功以心口擋出安維佩嘅射門。

所以話單刀唔係一味衝，亦唔可以一味死守底線。要因應唔同情況，包括波嘅位置、隊友嘅位置、射門角度、射手推得順唔順、自己嘅起始位置等等去作出調整。最緊要好似紐亞咁要不停閱讀球賽嘅發展同埋不同球員嘅位置，咁先可以做到夠決斷而準確嘅選擇。