愛爾蘭小將頂替艾利臣救利物浦一命


歐聯夜又黎料,上週本身利物浦擊敗阿特蘭大就可以出線,點知主場輸 0:2 搞到今場對阿積士又要搏命。然後賽前仲傳聞話艾利臣中咗武漢肺炎要停賽,之後終於搞返清楚原來係上一場比賽已經拉傷咗 Hamstring,大家都以為今場高普會用阿祖安之際,最後佢竟然派出22歲愛爾蘭籍小將基利靴正選上陣。

雖然基利靴今次係第一次於歐聯賽場上陣,但其實佢之前已經幫利物浦踢過幾場英格蘭聯賽盃嘅賽事,但表現都係麻麻地,所以難免利迷開波前會對呢位小將抱有懷疑。不過最後今場基利靴嘅表現應該令唔少人跌眼鏡,因為佢憑住全場4次撲救以及7成嘅傳球成功率幫助利物浦成功以1:0擊敗阿積士,成功提早一場以首名姿態出線歐聯16強。

今次一齊黎睇下今場佢其中三個嘅撲救:

32" 馬斯拉爾
- 賽事嘅32分鐘,阿積士右閘馬斯拉爾大慨於30碼嘅一球遠射,基利靴冷靜觀察個波嘅去勢,見到個波一直向上飄,所以最後使用 Top Hand Save 撲出呢個射門。

57" 馬斯拉爾
- 又係馬斯拉爾嘅射門,今次佢同隊友做一個撞牆去到禁區內偏右離門大慨16/17碼倒,用左腳射一個遠柱地波。雖然基利靴今次都一樣撲得走個波,但今次佢嘅準備動作就差少少喇。可以睇到佢嘅重心有少少向咗後,令到佢即使落得切地,但因為上半身重心向後令到佢唔夠力量將個波撲出更遠嘅位置,最後令阿積士嘅尼維斯可以進行補射,不過佢最後只係射中柱彈出,令到比賽當時仍然維持住 0:0 嘅戰局。

88" 亨特拿
- 去到臨完場前88分鐘,當時利物浦已經領先緊 1:0,所以基利靴應該承受住唔少壓力希望可以幫到利物浦贏出呢場賽事,咁就無後顧之憂。點知阿積士右路一個傳中,過曬法賓奴嘅頭,令到亨特拿得到一個黃金入球機會。亨特拿最後頂出一球角度雖然唔算刁鑽但力度十足嘅頭鎚,基利靴今次就醒目,佢見到球傳中佢根本無機會出迎就立刻向後移多兩步爭取反應時間,最後可能就係因為呢兩步令佢反應夠快成功撲出呢球攻門,呢個撲救對利物浦最後能夠贏波非常關鍵。

仲記得基利靴之前喺聯賽盃對阿仙奴嘅賽事當中表現十分怯場,有幾球明明撲到都變撲唔到,同對面上曬身嘅蘭奴非常大對比。今場雖然講唔上佢完全唔怯場,但該做嘅都做到曬,最後仲拎埋張 Clean Sheet,對於呢位後生仔黎講第一場歐聯有咁嘅表現絕對交足曬貨架喇。

賽後高普亦都話佢揀基利靴上陣嘅原因,除咗信任佢嘅撲救能力之外,係因為希望利用佢嘅用波同傳球能力去破解阿積士嘅逼搶,而確實今場基利靴都做到高普嘅要求,難怪完場之後高普即刻衝出去攬實佢啦!

基利靴 對 阿積士 精華片段

如果喜歡我們的文章,請即分享到︰

標籤: 歐聯  利物浦  地標  艾利臣  基利靴  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→