單刀射出界唔一定係射手廢 門將封位大學問


歐聯小組賽又黎料,今日想講下當中兩位門將對住一個相對窄角度嘅單刀如何應對,而兩位主角就係慕遜加柏嘅瑞士籍門將森馬 Yann Sommer 以及剛剛復出無耐嘅利物浦門將艾利臣。

先講慕遜加柏,佢地嘅對手係皇馬,皇馬攻力就不容置疑架喇。不過今場森馬嘅表現真係非常唔錯,救出咗唔少攻門,失嗰兩球亦都係非戰之罪。而今次想講嘅係佢應對夏沙特嘅一球單刀,呢一球係由左路嘅賓斯馬傳中開始。當森馬見到賓斯馬嘅傳中,佢已經知道自己無機會沒收呢球之餘,夏沙特將會衝到入黎接應,由於佢本身已經企得離門線較出,所以佢即刻張開兩隻手並儘快移步到夏沙特面前。當佢見到夏沙特已經無望個龍門並準備拉弓,森馬就立即停低準備做撲救。而呢一球由於森馬出迎出得夠快,而封位亦都封到夏沙特根本無乜位可以射,夏沙特最後就選擇射一球近柱高波,不過最後射出網側,森馬波都唔使掂就化解咗呢個攻門。雖然最後皇馬都追返2粒,不過如果唔係森馬,慕遜加柏隨時1分都拎唔到。

而利物浦嘅對手係米迪蘭特,其實艾利臣喺比賽第3分鐘嘅時候已經需要擋出一球單刀,之後89分鐘米迪蘭特嘅安達斯拉亞 Anders Dreyer 接應右路傳送之後一個假身扭過咗祖高美斯,再引球推進到小禁區頂面對住艾利臣。艾利臣喺拉亞扭過祖高美斯一刻因為本身企得近門線,所以決定要全速出迎。但當拉亞準備起腳一刻,艾利臣已經係正佢面前張開兩隻手迎接射門。最後拉亞同夏沙特一樣由於射門角度已經比門將封到無曬位,唯有嘗試 Chip 一球近柱波,雖然射過咗艾利臣不過最後一樣係射出網側,令到利物浦當時能夠維持 1:0 嘅比數,之後更加靠沙拿射入12碼以2:0勝出。

成日見到有人講話單刀封位係做職業門將嘅基本野,唔識係你廢唔係其他人勁。其實我認同架,講真上到去歐聯呢啲水平如果你連基本點樣封單刀都唔識,其實連教練都好難說服人點解會用佢。

不過識還識,落到場你用唔用得返又另一回事,唔可以話一位門將有一兩次封得唔靚就話佢唔識封單刀。平時訓練黎黎去去都係對住嗰班人,而足球場上有成22個人,你要同一件事完美重現嘅機會率微乎其微,落到場就算22個人企位同你平時練習一樣,但個射門位置同平時比前咗幾 cm 都足以影響一位門將嘅判斷。

如何分高下就係睇一位門將識唔識融會貫通,喺正式比賽入面嘅情景運用返平時練成嘅技巧。所以我認為平時練波一定要比足100%,因為一落到場唔多唔少都會因為其他外在因素(例如 主場作客,球迷打氣聲,天氣 等等)影響自己嘅表現,最後可能得返80%或者更低,如果平時練波都唔盡力,比得60~70%,落到場你想踢得好都難。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→