和你講數據:一圖解釋車仔點解買文迪


講過撲救嘅 xSave,又講過傳送嘅 Pass Completion %,今次就想同大家講下上季英超門將嘅角球應付數據。今次再次借用龍門分析員 John Harrison 嘅數據黎同大家傾下各位門將喺應付角球嘅表現,而為咗解釋埋點解車仔千揀萬揀偏偏揀咗買雷恩嘅文迪,佢亦都將文迪上季喺雷恩嘅數據放埋入去。

首先講解下今次圖表點睇嘅先,x 軸就係門將嘗試出迎接或打出角球除以總面對角球次數嘅比率,而 y 軸就係門將接實角球或者將個波打出去非危險地帶嘅成功比率。所以圖表入面愈靠右嘅門將就代表佢地愈敢出黎迎接角球,圖表入面愈高嘅門將就代表佢地成功化解對方角球攻勢嘅成功率愈高。

從圖表可以睇得出如果單獨講上季英超最敢出迎嘅門將嘅話,咁就係修咸頓嘅麥卡菲同埋水晶宮嘅古亞達,不過如果計埋化解角球攻勢成功率嘅話表現最佳嘅除咗繼續有麥卡菲份之外就係曼城嘅艾達臣。麥卡菲上季有總共出迎應對14%嘅角球,當中有9成都係成功化解嘅。而艾達臣上季總共嘗試出迎10次,大慨佔曼城總面對角球數量嘅大慨12%,佢成功接實6次並4次打出去非危險地帶。上季佢喺角球嘅表現可以話係一百分滿分,又點估到佢對列斯聯失嘅一球偏偏就係角球打手鎚失誤而失呀...(唔通真係同佢呢排不停試緊唔同牌子嘅手套有關?

而另一個極端就係白禮頓嘅馬菲賴恩以及車路士嘅阿里沙巴拿加,佢地分別只敢出迎應對唔多於5%同4%嘅角球,而成功率仍都只有分別不足7成以及低得可憐嘅5成。睇返確實數據,阿里沙巴拿加總並只係試過4次角球出迎,有2球打去非危險地帶,有1次打去危險地帶,最後1次更加完全打空益埋韋斯咸直接射入。而點解話呢個數據可以解釋到車路士買文迪嘅原因呢,因為佢憑著佢197cm 嘅高度上季喺雷恩總共嘗試16次角球出迎,總共接實8球,有5球打去非危險地帶,3球打去危險地帶,並且無試過打空。如果將文迪呢個數據拍埋去上季嘅英超門將數據,佢就只會排喺艾達臣同麥卡菲之後,所以相信車路士就係想借助佢呢一個優點去處理經常於死球失波嘅情況。

其他嘅亮點:
- 水晶宮嘅古亞達熱刺嘅羅里斯雖然出迎率都算高,但只有分別不足8成同6成嘅成功率
- 利物浦嘅艾利臣喺呢方面就無咁標青,出迎嘅次數不足1成而成功率亦只係僅僅高過7成
- 被認為唔夠班嘅藍斯度終於喺呢方面比起上一手嘅甸軒達臣稍為優勝

如果喜歡我們的文章,請即分享到︰

標籤: 車路士  門將  角球  Kepa  Mendy  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→