只得80分鐘專注 狼隊紐卡素龍門尾段跌watt齊失波


剛剛呢個星期嘅英超其實仲有一場比賽入面兩位門將都有值得討論嘅地方,就係狼隊主場對紐卡素。兩位門將分別係柏捷斯奧以及達盧。

其實兩位門將於呢場比賽入面嘅表現原本都尚算唔錯,不過一到後段唔知係唔係體力下降,一同出現決定上嘅小失誤。雖然未至於係咩天大嘅問題,但以佢地能力我相信係絕對可以避免。

首先就係80分鐘狼隊嘅攻勢,柏度尼圖左路開出罰球,由卡林威爾遜用頭鎚解圍,但點知就頂咗比企係禁區頂嘅魯爾占美利斯。占美利斯控咗一下,然後黎一個半窩利射門,雖然前面有多位紐卡素球員,但呢個射門成功穿過曬佢地。呢下射門都算有力度,前半段嘅飛行路線仲一路向上升,唔知係唔係咁令到達盧有少少預判錯誤,以為個波會繼續向上飛而令到佢一早已經決定用 Top Hand 去救。點知個波去到一半就開始曲墜,令到達盧已經轉唔切手焗住要繼續用 Top Hand 去救之餘,同時亦都撲唔中曬個波,所以最後只能撲埋入網。呢球最後去到達盧身邊其實已經落返去大慨心口位置,而 Top Hand 只比較適用於膊頭以上高度嘅射門,如果唔係其實用返順邊嘅手先可能會夠力撲走個波,之前我地有個 Post 正正以羅里斯做示範講解幾時用 Top Hand ,有興趣嘅朋友可以睇返。

繼達盧小失誤之後,就到89分鐘紐卡素嘅一球禁區頂偏右嘅野球。當時柏捷斯奧唔知點解好淡定地個身係完全向出,諗住紐卡素只會斬入黎。而人牆其實都排得比較進取,其實幾明顯近柱係夠位可以彎入。最後紐卡素嘅積及梅菲就把握好呢次機會,真係嘗試射一球近柱波,成功彎過人牆 (狼隊嘅丹當卡仲要彈開讓埋條路出黎)。呢個時候睇到柏捷斯奧好似好愕然咁,似乎終於發覺自己捉錯路,完全估唔到紐卡素會選擇射近柱,但當時佢嘅身體已經完全準備唔切。就算柏捷斯奧有嘗試飛撲,當佢隻手同個波接觸一刻其實個波未入曬都已經入咗半個,因為柏捷斯奧準備不足令到佢重心向後,從而唔能夠向前撲,所以最後柏捷斯奧同達盧一樣拍到都照入網。

其實呢場比賽有個有趣數據同紀錄,計埋呢場其實狼隊對紐卡素呢兩隊總共喺英超對碰過11場,而呢11場入面兩隊都未過成功保持不失球,亦都係英超咁多隊球隊對碰入面最高嘅一同保持唔到不失球紀錄。唔通兩位門將就係為咗延續呢個紀錄所以.....? (戴定頭盔,曲呀喂)

如果喜歡我們的文章,請即分享到︰

標籤: 狼隊  紐卡素  門將  失波  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→