又一12碼撲救 CCC尼示範招牌擰膊技 精選

【 CCC尼的招牌擰膊技 】

又一球！繼 Sam Gor 奧祖亞 Guillermo Ochoa 以及古圖奧斯 Thibaut Courtois 喺今屆世界盃撲出 12 碼之後，喺香港一向被球迷以「CCC尼」稱呼嘅舒捷斯尼 Wojciech Szczesny 都唔執輸，喺對住沙特阿拉伯嘅小組賽第二場賽事臨完上半場前救出對方嘅十二碼以及補射，精彩到不行。

－－－－
上半場 45+1，波蘭當時領先緊 1：0，不過一下碰撞加上 VAR 嘅建議令到沙特喺臨完上半場前得到一個十二碼，由艾度沙利 (Salem Al-Dawsari) 主射。

艾度沙利開始助跑，舒捷斯尼一直保持挺直。直至艾度沙利拉弓一刻，舒捷斯尼先踏左一步上半身扭左，作勢向左邊做 Power Step 起跳。
但當艾度沙利掂波一刻，舒捷斯尼上半身立即扭返向右，右腳提起借助地心吸力以及左腳嘅側向力令自己加速落地。

當上半身跌到去接近地面嘅角度，右腳立即踩向重心偏左嘅位置加力，貼地飛向右邊，證明舒捷斯尼唔單止捉到路對手會射右邊，仲係一早捉佢射右路地波，從而成功捉路撲出。

（本身第一下睇落以為舒捷斯尼喺艾度沙利掂波一刻好似雙腳離開曬白界，但最後睇返另一個近啲嘅鏡頭見到佢左腳腳踭應該有少部分仍然喺白界上，所以旁證同 VAR 無示意需要重射應該係合理嘅判決。）

不過撲出不遠，艾巴歷基 (Mohammed Al-Burayk) 立即衝前嘗試補中。不過喺艾巴歷基射波一刻，舒捷斯尼已經好快起咗身。相信舒捷斯尼都已經捉埋艾巴歷基嘅路，身體平衡好後立即抽起左腳，令重心向左傾，撲出埋呢球補射。
－－－－

其實舒捷斯尼一向喺撲 12 碼嘅表現都唔錯，睇返 transfermarkt 嘅數據，佢喺法定時間內嘅 12 碼撲救率足足有成 3 成，相信同佢呢招以前效力阿仙奴已經廣為人知嘅轉膊頭技巧有關。

比較出名嘅例子，除咗有較早前 Sam Gor 奧祖亞對住利雲度夫斯基之外，仲有上年桑馬 Yann Sommer 喺世界盃外圍賽救出佐真奴 Jorginho 嘅 12 碼都有用到類似嘅技巧。
雖然你可以話艾度沙利處理得唔算十分之好，但又可以諗下，可能正正就係因為舒捷斯尼嘅轉膊頭技巧，令到艾度沙利猶豫，影響咗佢嘅處理都絕對唔出奇。