出迎封位未必有著數 藍斯達爾聯賽盃失球因太過進取

【 進取與保守的平衡 - 藍斯達爾 】

有唔少人經常有一個錯覺,覺得守門員企得愈出封位就愈好。以物理學角度上,如果當係一個平面淨係由射手嘅正面射門角度嚟睇,無錯企得愈出位守門員就愈能夠收窄正面嘅射門角度。

但同樣地用返物理學嚟講,又係咪咁簡單?有無考慮到企咗出嚟令到門將同個波嘅距離短咗會同時令到門將可以反應嘅時間同樣大大縮短?另外齋睇正面望埋去就話無乜角度啫,唔好唔記得仲可以由上面笠過同埋唔一定要立即射門,可以由側邊扭過門將先都仲得。而英格蘭聯賽盃四強次回合由阿仙奴對住利物浦嘅賽事入面,藍斯達爾嘅兩個失波就正正示範咗守門員嘅位置絕對唔係愈進取就一定愈好。

首先第一球祖達由禁區頂左路推返大位準備起腳,藍斯達爾嘅企位相對進取,大概企係離門四碼位置。臨到祖達起腳之前,佢更加再踏前半步,令自己企喺離門大概五碼位置。祖達起腳一刻,阿仙奴有三位球員一齊嘗試阻擋射門,令到藍斯達爾嘅視線受阻。

由龍門後面角度可以好明顯睇到藍斯達爾喺祖達起腳一刻做出小跳步,落地嘅時候係右腳先落地,證明佢已經預判射門會飛向自己左手邊。相信呢個預判同三位隊友落剷嘅動作有關,令到藍斯達爾認為祖達只會向遠柱射門,偏偏祖達就揀射返近柱,殺藍斯達爾一個措手不及。

雖然最後個波軟弱無力,但由於藍斯達爾嘅身體姿勢已經預備曬向左邊撲,令到佢需要重新調整。但當藍斯達爾回到身向返右邊撲嘅時候,佢咁進取嘅企位令到當時個波其實已經去到佢右手隔離。令到藍斯達爾落地一刻個波已經過埋佢嘅身體,令到呢球無乜力度而且無乜角度嘅射門同樣能夠射穿藍斯達爾十指關。

當然以藍斯達爾企得咁前,如果祖達選擇硬射遠柱,或者喺一個無乜隊友阻擋視線嘅情況,未必係一個差嘅選擇。因為咁樣除咗可以封窄正面射門角度之餘,亦可以預備如果祖達傳比隊友後隨時需要出迎應對嘅單刀情況。

之不過,每個選擇都自然有佢嘅好處以及壞處,自然每個選擇應該要揀返適當嘅時候應用。例如當遇到今次呢啲人多密集加上個波離門唔算好遠嘅情況,門將好有機會非常之遲先睇得清楚個波嘅去勢,增加自己可以反應嘅時間比起封窄射門角度更為重要。如果呢一球藍斯達爾稍為保守返啲,大約企喺門線前三碼位置,為自己爭取多兩碼嘅距離以及反應時間,相信佢即使仍然預判個波會飛向遠柱,都仍然會有足夠嘅時間畀佢回身落地救出呢個射門。

唔好睇少藍斯達爾企出咗呢兩碼,要記得一個波飛過兩碼嘅時間其實一啲都唔長,有時就係有無爭取呢兩碼嘅距離以及反應時間,形成救到與救唔到嘅結果。


第二球就已經去到下半場,當時祖達成功突破阿仙奴防線準備單刀,而藍斯達爾相信本身已經企得幾出預備做清道夫。可惜個波仍然係彈緊地,而藍斯達爾回後唔切,唯有盡力出迎嘗試封窄正門射門角度。之前都有提過,彈地波嘅單刀守門員係相對難應付,因為射手有更加多嘅處理選擇,如果守門員太快出迎只會令射手更易應付。
而今次藍斯達爾就係因為回後唔切,跌咗入祖達嘅陷阱。祖達見到藍斯達爾一出迎嘗試撲向個波,雖然正面射門角度確係細咗,但由於藍斯達爾身後有大量空位,所以祖達立即挑起個波笠過藍斯達爾,令利物浦領先到 2:0,而最後利物浦亦都係以為呢個賽果擊敗阿仙奴成功打入今屆聯賽盃決賽。


當然呢下我覺得藍斯達爾回唔切後,全速出迎總好過企定定好被動咁由得對手前鋒點舞都得。但亦都證明咗守門員即使出迎出得切封窄到正面射門角度,但如果位置過份進取,其實除咗正面射門之外,對方仲有好多其他處理嘅選擇,胡亂出迎封位就會好易墮入對方嘅圈套㗎喇。
標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→