出出下唔出 碧福特驚又踢傷人定犯腦筋上嘅錯誤？ 精選

話說之前先講完艾達臣同馬天尼斯輕出令到對手輕鬆射入，夜晚就輪到碧福特又有新素材。不過碧福特就偏偏同嗰兩位相反，艾達臣同馬天尼斯就輕出，碧福特就出出下唔出，搞到失埋啲本身絕對有能力救嘅波。
琴晚愛華頓作客對富咸，碧福特出事一刻就係富咸球員波比列特接應傳送，成功放甩耶利美拿推到入小禁區頂。當碧福特見到波比列特控球一刻佢其實已經好快作出反應去橫移對返準個波，點知佢出出下就停低諗住靠反應撲救就算。最後令到佢同個波都仲有兩三個身位嘅距離，咁即係點？即係根本無封過位囉，咁波比列特仲唔一句多謝射個遠柱波一招收你皮咩。

其實去到呢球離門咁近嘅距離，然後角度已經去到咁窄，雖然耶利美拿完全追唔到波但係同時封死咗波比列特可以 Cup 返左腳嘅選擇，所以波比列特當時根本只有射門一個選擇。呢個情況下，碧福特其實只有一個選擇就係全力出迎以 Block Save (K腳) 或者 Spread Save (大字形) 去盡力封窄波比列特嘅射門角度。可惜碧福特唔知係唔係之前亂咁出迎踢傷完雲迪克之後唔敢亂黎，決定留守底線前試下憑反應做撲救，但當門將嘅企位係咁唔上唔落，嗰兩三個波位嘅空間根本爭取唔到幾多時間比自己做反應。
其實你問我，我覺得如果習慣／擅長用埋腳擋波嘅門將係絕對有機會救到呢一球。因為最後波比列特嘅射門唔算好有角度，只係喺碧福特嘅右腳腳側飛過，但因為碧福特根本無用開 Split Save 以腳擋波嘅習慣。呢一下碧福特就想用一個技巧叫 Negative Step Dive (將射門方向嘅一邊腳向內收，令到嗰一邊嘅手有空間落地撲救一啲貼地嘅射門，例如呢球碧福特將右腳收向左邊，令右手有空間落地)，不過大家一睇就知呢球佢隻右手根本唔會有足夠嘅時間落地，如果有用開腳擋嘅門將 例如迪基亞，相信自然反應一定會以右腳伸出黎擋出呢球射門。

其實碧福特踢國家隊嘅時候真係好有自信，傳送準繩度高，撲救方面亦都唔差，單刀出迎又夠果斷，唔會亂咁飛出黎，點解一踢返球會比賽就打回原形咁架呢？