世盃前西班牙記者爆內幕?安歷基迪基亞矛盾又被翻炒

【 被退休的迪基亞? 】

迪基亞同安歷基呢兩個名只要一拉埋,就會引起激烈討論。當我以為世界盃已經準備開波應該可以告一段落,點知西班牙就有報導再次挑返呢個話題出嚟。

西班牙記者 Jose Alvarez 就喺 El Chiringuito 呢個足球電視節目入面提到,當安歷基今年三月決定選拉也而唔揀迪基亞入國家隊之後,佢突然「被退休」?一齊睇睇 Jose Alvarez 點講。

----
幾個月前安歷基喺決定放棄迪基亞,選入拉也頂替佢嘅位置嘅時候,安歷基有打過比迪基亞。當時安歷基同迪基亞講,佢唔會再信任迪基亞嘅能力,而佢做呢個決定係純粹因應球隊嘅技術要求。而迪基亞當然有問返安歷基咁即係點,但安歷基就無再解釋落去。

過咗冇耐,迪基亞收到西班牙足總主席 Luis Rubiales 嘅短訊,內容係「David,有人同我講你決定咗退出國家隊,我好高興你終於喺呢件令你煩惱咗咁耐嘅事有所決定。」

然後迪基亞就當然回覆:「咩話?我根本無講過任何嘢,邊個同你講我會退出?教練淨係同我講話佢唔會再選我咋喎。但我從來都無話要退出國家隊,連諗都無諗過。

迪基亞當時對於安歷基同埋足總主席嘅溝通以及主席嘅短訊感到莫名其妙。
----

相信大家一向都知道,我係偏向理解安歷基唔選迪基亞入選嘅原因,因為其實事實擺在眼前,安歷基嘅戰術對於守門員嘅要求同以往嘅實在太唔同。喺控球權長期佔優嘅情況下,控傳次數仲多過撲波,咁自然對守門員能力嘅要求自然有所不同,所以其實唔難理解。

雖然臨踢世界盃前先咁樣爆呢單已經成 8 個月之前嘅料出嚟好似鬼鬼地,先假設真有其事,如果安歷基真係咁樣幫迪基亞同足總主席講,令到迪基亞「被退休」。安歷基咁樣管理球員關係,又確係點都幫唔落。就算迪基亞幾唔啱你心水都好,又無必要令到佢以後都無得翻身嘅。

究竟係記者無中生有?定係純粹溝通問題?真相係點呢一刻已經唔重要,入選名單已塵埃落定。不過呢單花邊新聞的確可以炒熱世界盃氣氛。波未踢,球迷已經咬牙切齒!
標籤: 門將  守門員  龍門  

留言


請按此登錄後留言。未成為會員? 立即註冊
    快捷鍵:←
    快捷鍵:→