【史雲斯 vs 曼聯賽後短評】 精選

羸波固然好，但作為冠軍球隊既話，今場表現真係驚嚇度十足，面對「英超巴塞」史雲斯，控球率只佔46%，雖然控球率唔係大 X 晒，但如今歐洲眾多球隊都以前場緊迫、控球、短傳滲透踢法為主，曼聯喺歐洲賽事既前路真係唔樂觀。

今場波以史雲斯狀態秤先，球賽上半場一直都係史雲斯控球在腳，如果史雲斯前鋒把握力夠勁曼聯就88，一直禁住曼聯黎砌既史雲斯，短時間內連失2球並冇失去信心，反而下半場繼續向曼聯施壓，同曼聯一人谷一段，仲捉到韋碧克出錯射入1球挽回面子。
比賽當中，曼聯中場中路多次被史雲斯輕易穿過直接面對防線，凸顯曼聯中中既缺點：冇活力、球場覆蓋範圍細、hold 唔到波，可幸既係卡域克發揮水準清波清到喘晒氣，而卡華利真係好失敗，淨係傳比執邊果個，唯一有表現既係幫隊友補位呢方面。所謂得中場得天下，中場 hold 唔到波，解圍又落喺對方腳下，迫一迫又做左迫甩，曼聯面對呢類球隊真係長時間比人禁住黎砌架！要改善中場大問題真係要買返個有技術既 box to box 去幫輕卡域克。

喺打陣地戰當中，華倫西亞既作用完全係0，冇突破落底出波，要讚既喺第2球咁岩落喺佢腳下唔貪功傳中，勁ban 既話真係未必入！去到比賽後段有空位先比佢爆到，28歲既佢仲有好大進空間；而傑斯真係年紀大啦，轉數同速度真係跟唔上英超節奏，對於佢亦唔適合作出太多批評。
後防方面，同樣高齡既 rio 發揮到高空優勢，但已經冇能力面對突破；維迪冇咩大問題，值得莫耶斯既信任；艾夫華喺左路打到風生水起，keep 到上季狀態；鍾斯作為右閘，技術真係太差，配合華一招令曼聯斷晒右路攻勢。

最後講既係前鋒線，喺供應少既情況下都包辦4球，都係靠個人質素搵食，雲佩斯入2球盡顯功架，韋碧克第2球射得好乖巧，要插佢既係喺後場玩高章，累到卡華利食黃牌同累球隊失波，如果入左2球之後自信就爆棚，之後對曼聯都幾危險；朗尼復出，表情同隊友貌合神離，都交到助攻同參與第3球攻勢，對於莫耶斯黎講都可以接受。

迪基亞：7分 (穩定表現，接高波不再猶疑)
鍾斯：6分 (冇比太多機會對手突破，進攻0表現)
艾夫華：8分 (助攻助守，又有1球助球，第2球都關佢事)
RIO：7分 (防守稱職，但係都要比人爆過)
維迪：7分 (防守稱職)卡域克：8分 (包位清波太辛苦，無名英雄)
卡華利：5分 (低調防守，對進攻冇幫助)
傑斯：6分 (年紀大)
華倫西亞：6分 (其實佢都頂到好多波，仲有2傳架，不過陣地戰冇乜突破)
雲佩斯：9分 (乜都唔洗講，2球世界波)
韋碧克：7.5分 (本來9分，後場玩野要扣分)
朗尼：7分 (2球入球都有份參與)
安達臣：6分 (咁少時間踢條毛咩)

評完分，想再講下韋迫甩，筆者知道好多人都唔鐘意佢，亦包括我，佢上季表現真係符合 百X 既條件，但今場表現真係唔錯架，入左2球！跑位唔再係阻住自己人，係後場屎忽鬼玩高章姐，大家再比啲耐性，佢真係可以做到百 X 成材系列既一份子架！