韋費特沙夏未能喺英超出場原因 精選

先講佢既背景，佢出身於水晶宮青訓，2012年保頓曾出價700萬英鎊被拒絕，到2013年冬季以1000萬英鎊 (另加附帶條款500萬英鎊) 加盟曼聯，再借比水晶宮打到季尾，所以佢係費格遜最後一筆收購。

2013年夏季佢正式返到曼聯，而季前熱身賽佢亦得到唔少機會，筆者相信大部分曼迷都淨係睇過佢喺呢啲賽事既表現。

先重溫佢喺季前熱身賽既個人精華：
https://www.youtube.com/watch?v=miK4cuBh698
而佢唯一喺正式賽事亮相，就係社區盾對韋根，後備入替華倫西亞，再黎重溫呢場既個人精華，
https://www.youtube.com/watch?v=C6j6zxh-WeQ
睇晒之後就入正題，先講波底，相對同樣屬於新仔既贊奴沙同連加特，睇過佢3個踢波就知，贊奴沙既波底係最好；連加特波底都唔差，控個波都唔會彈開好遠，射術應該係3個之中最好；而沙夏波底係最差既一個，對個波既控制唔算好好，佢優點係速度快同「比較有技術」，但缺點十分明顯，就係好少扭過人，以及 show off 技術但經常失敗。從隊中既翼鋒去比較，分別係蘭尼同華倫西亞，蘭尼係隊中個人能力最強，無論左右翼都理應出任出選，淨低既就係華倫西亞，相比華倫西亞，沙夏冇華倫西亞既世界級速度，而兩者傳中都屬於硬射，華倫西亞以速度落度傳中，沙夏就間中扭過人或走空位去傳中，個人防守能力及協防方面華倫西亞無疑係最強既一個，加上實戰經驗，所以華倫西亞現今係比沙夏更優勝。
而從位置上比較，蘭尼與華倫西亞都係打右翼，喺楊格既垃圾表現之下，除左續約問題以及蘭尼於左翼未能有打右翼時既表現之外，呢個亦係贊奴沙得以快速上位既原因，沙夏作為右邊路球員，作為右翼第三選擇，上陣既機會自然比贊奴沙少，除非蘭尼打左翼，楊格被徹底放棄，實在諗唔到沙夏會有幾多時間比佢上陣。

沙夏被外間稱為「新C朗」，加上1000萬英鎊既身價，自然令唔少曼迷 J 到出血，認為沙夏現今係有足夠能力出場，但相對18歲既C朗，沙夏真係冇資格同佢比，論波底C朗贏9條街有技術去 show off，論過人技術C朗比佢好好多，其實以沙夏既波底係好難迫上C朗既高度，但年齡、速度、身型、野心係沙夏既優勢，如能夠努力訓練，超越擁有世界級速度既華倫西亞只係時間問題，當然賣走華倫西亞同楊格，係沙夏最快上位既方法。
筆者作為普通球迷，實在唔想睇死版既落底射中同冇料死扭 show off，總括黎講，沙夏以英冠正選球員身份轉投曼聯，實力應該未能及得上現今曼聯球員既水平，甚至連後備都未及得上，而球隊既訓練水平亦會比佢喺水晶宮時高好多，佢個人能力唔算十分突出，1000萬只係買沙夏既潛力同英籍，位置上與蘭尼、華倫西亞競爭右翼，筆者認為以上3點先係沙夏未能喺英超登場既原因。
喺10月初，沙夏被傳搞莫耶斯個女，令到部分曼迷將沙夏少出場既罪名又加喺莫耶斯身上。