【聯賽】曼聯並沒有改善 精選

筆者因深夜而冇睇最緊聯賽盃對利記既賽事不作出任何評論，但從季初1球輸比利記同大敗曼城，都分別為防守角球付出代價，對利記被一箭定江山，對曼城完半場前被攻入第2球嚴重打擊球隊士氣，呢點係曼聯上上下下都要關注既重點。
對利記既係李奧未能用身體壓迫防守造成對方輕鬆迎頂；對曼城則係費蘭尼走甩耶耶托尼而失波，兩球入波時間分別於開場3分鐘以及補時階段，反映出曼聯球員喺開段及尾段都冇集中精神，發生同樣錯誤，教練真係要負一定既責任！兩場比賽當中，莫耶斯同樣排出442陣式，面對對方3人中場既人數優勢時完全被壓制，基於曼聯中場球員特點，曼聯面對強隊理應起用3人中場，以人數彌補中場活力不足及壓縮防守空間。

曼聯的先天缺陷，呢篇係季初筆者喺曼聯輸比利記之後寫，面對曼城亦未能解決，而且更凸顯出曼聯防線面對快速靈活球員既不濟 (對比利記攻擊球員)。於第一球失波中，後防線既企位並冇出錯，只有華倫西亞並冇緊追對方左閘及阿古路走到空位，失波後維迪亦向華倫西亞指點，亦證明失誤在於華倫西亞冇緊追對手左閘。下半場既壓上令曼聯後防有更多空位，喺本身已經應付唔到對方球員既情況之下，再失波乃正常之事。至於球員方面，楊格同樣喺兩場大戰出任正選，同樣打少一個，同樣冇防守、冇突破、冇傳中，佢都係好好地做一件垃圾廢物吧，唔好再出黎獻世；而韋碧完呢個球員，曼聯迷都應該比機會佢成長，畢竟佢仲年青有進步空間... 費查同 EVANS 都係咁樣捱出黎。
後備上場既卡華利既表現，則令筆者感到意外，因為費蘭尼同卡域克既跑動能力不足，無論進攻防守都處於劣勢，儘管卡華利技術與體能並唔係頂級，佢既無球狀態下既跑動，為球隊創造左傳接波既空間，好多曼聯迷話莫耶斯唔換攻擊球員落場，但筆者仍相當佩服呢一個調動，對曼聯進攻上有立竿見影既效果，未知係咪對死敵大敗同對莫耶斯討厭，而令好多曼聯迷忽略左呢一點？

總括黎講，莫耶斯盲目信任英籍球員令筆者十分失望，但筆者仍覺得球迷應該比時間莫耶斯同球隊磨合，大家請唔好忘記費格遜既冠軍球隊有好多缺點，上季能夠奪冠好大功勞屬於費Sir 執教曼聯26年既功力！