曼迷將費格遜擺上神枱

回看曼聯歷史,畢樹比皇朝後成績浮沉更試過降班,畢樹比接班人亦被畢樹比影響限制發揮,及後亦換過唔少教練,直至費格遜接任才開始另一個皇朝。好多曼迷話費格遜接手時曼聯係非冠軍,冇錯曼聯自1967年都冇拎過冠軍,但筆者翻查往績,自從1974年意外降班後1975年立即重新於頂級聯賽打拼直至1986年費格遜執教,總共有11年時間,期間有6屆均排在前四,最低排名亦只係第10名,而1981、1982、1983、1985都係排前四,即係費格遜接手前果5年,曼聯係屬於前列球隊;1986年11月費格遜接手之後以第11名完成第一季賽事,而第二季大手買人之下就以9分之差拎第2名,但之後2年成績下跌分別排第11、第13,直到第4年開始先回穩排第6及第2,並喺第1屆英超先至帶領曼聯重奪頂級聯賽冠軍。
歷史排名唔會呃人,費格遜雖然係接手非冠軍級球隊,但卻係接手有前四實力球隊,頭6年費格遜既成績亦差過上一任領隊成績,有三季排喺前十之外,只能以盃賽冠軍保住自己帥位,最後用左6年時間先建造自己既冠軍球隊。自費格遜2003年後3年無冠,曼聯排名非第1即第2,加上贏歐冠更加吸引唔少球迷,老紀大既費格遜終於退休,換黎既係莫耶斯接任,而呢一隊所謂冠軍球隊,靠既係費格遜多年黎深厚功力去支撐曼聯,而非球員質素,球隊中場防守與創造力問題一直都冇解決,上季兩翼更死火,後防人腳結構唔合理,問題一籮籮非一時三刻可以解決,呢啲係曼迷應該要認清既事實。
引用莫耶斯走啦!
費SIR 幾時復出?
冇前四啦,保都先算。
莫耶斯只係中型班教練冇料教大球會。
季初既失敗唔代表係啲乜,唔接受26年黎冇更換教練所帶黎既陣痛,從開季前已經話莫耶斯未夠班教曼聯,筆者想反問呢班球迷何以能夠以幾場波斷定佢未夠班?批評、評論係絕對可以,筆者亦一直從事實根據中贊賞或批評球員同教練既表現,但從未講過一句要教練落台既說話,包括費Sir 3年無冠時代,筆者回想當年無冠、歐冠小組賽出局、曼迷叫費Sir 退休既情境,依家莫耶斯正面對緊比費Sir 更艱難既困局!3年既等待終於等到曼聯重奪冠軍既時刻,當時戰術主流係開始流行433踢法以及內切翼鋒,費Sir 作為一個敢於嘗試既教練,經過3年時間先揾到最岩當時陣容既戰術,07年既防反戰術更達至巔峰。
讀歷史唔係要死記硬背,而係要吸取前人教訓同經驗,畢樹比離開後卻直接影響住更衣室、費格遜灌輸自己既足球理念用左4年時間,3年無冠頂住落台壓力,費格遜深知歷史唔能夠重蹈復徹,所以退休後自行決定遠離球員,拒絕干預莫耶斯,而從名宿麥昆尼說話中得知費格遜喺困難時接受畢樹比既寶貴意見,相信莫耶斯都會做返呢個舉動,正如名宿所講:接受建議是優點而不是缺點。頭4年不斷既挫折失敗磨練費格遜堅定不移既精神,從莫耶斯既愛華頓亦證明左佢有呢個特質,失敗並唔可怕,最緊要既係可以從失敗中學習,比時間莫耶斯乃曼迷現今唯一可以做既事。

阿仙奴名宿柏金曾經講過:"I really like Arsenal. But you, do you really like Arsenal? Or just Arsenal with trophies? "
呢句說話值得曼迷思考。

如果喜歡我們的文章,請即分享到︰

標籤: 莫耶斯  費格遜  

留言


請按此登錄後留言。未成為會員? 立即註冊
  • Ben Huang 於 29/09/2013 評論 NO. 1

    安慰說話唔知點講
    如果係相同人腳既情況下
    成績下滑仲會係球員問題?
    此頭4年不同彼頭4年
    莫師呢隊係爭英超冠軍人馬,同費sir果陣相比,會唔會太優待莫耶斯
    一隊冠軍級人馬可以用到咁,身為敵對球迷既我都覺得莫帥真係提早收山吧啦。
    根本唔識點分配人手去出征咁多條戰線

  • 陽光宅男 於 29/09/2013 評論 NO. 2

    引用原帖Ben Huang 於 42 分鐘前 發表
    安慰說話唔知點講
    如果係相同人腳既情況下
    成績下滑仲會係球員問題?
    此頭4年不同彼頭4年
    莫師呢隊係爭英超冠軍人馬,同費sir果陣相比,會唔會太優待莫耶斯
    一隊冠軍級人馬可以用到咁,身為敵對球迷既我都覺得莫帥真係提早收山吧啦。
    根本唔識點分配人手去出征咁多條戰線
    我見到既數據係費SIR接手前5年有4年排前4,
    我見到呢隊所謂冠軍球隊, 缺點同問題實在太多, 上季拎到冠軍真係靠費SIR功力, 中場,兩翼真係廢到無眼到, 後防年齡結構亦唔算好好

快捷鍵:←
快捷鍵:→